Platformê Kede û Demokrasî yê Rihayî bi eşkerayîyêk hêrişê ke vera elewî û durzîyan yenê kerdene şermezar kerdê û vengda hêzanê mîyanneteweyî ke berpirsîyarî bigîrê.
Platformê Kede û Demokrasî yê Riha hêrişê ke Sûrîye de hêrişê ke vera elewî û durzîyan yenê kerdene, qezaya Helîlî ya Riha de vernîya AVM’ya Novada Park de eşkerayî daye. Temsîlkarê platformî û Parlamenterê Rihayî yê DEM Partî Ferît Şenyaşar û xeylê kesî beşdarê eşkerayî bîyê. Metnê eşkerayî Raybera Şubeyê Komela Heqanê Merdiman a Rihayî Demet Aykut wend.
Sucê merdimîye
Demet Aykut eşkerayî de dîyar kerd ke hewteyêk o Lazkîye, Ceble û Humus de cayê ke zafane elewî û armenîyî tede ciwîyenê, hêrişî yenê kerdene û nê herişî vera merdimîye suc ê. Ame dîyarkerdene ke ê vera dewamkerdişê nê hêrişan bi endîşe yê û goreyê agahîyanê ke înan girewtê cugehî bi zanayîş yenêhedefgirewtene, însanî bi zor yenê koçkerdene, îbadetxaneyî yenê rijnayene û însanê sîvîlî yenê qetilkerdene. Patformî dîyar kerd ke nê hêrişî tena rewşêka pirodayîşî nîya; goreyê huqûqê mîyanneteweyî sucê şerî yê û vera merdimîye zî suc ê.
Vengda hêzanê mîyanneteweyîyan
Demet Aykut îfade kerd ke vera elewî, durzî û armenîyan tarîxî ra heta nika qirkerdişî yenê kerdene û vat ke şîdeto ke cinî û gedeyanê ma rê yeno ferzkerdene, remnayîş, hêrişî cinsîyî, bi zorî zewejnayîş û îhlalkerdişê heqê cuye sey encamanê tewr xirab ê şerî yew vejîyeno hemverê ma û wina dewam kerd: “Nê hedîseyî ke Sûrîye de qewimîyenê encamê polîtakayanê bêcezakerdiş û bêtesîrîya komelê mîyannetewî yê. Qirkerdişî bi tu awayî nêeşkenê bêrê meşrukerdene. Ma vengdanê heme Komelanê Mîyanneteweyî, Neteweyanê Yewbîyayeyî, Konseyê Ewropayî û heme mekanîzmayanê heqanê merdiman ke berpirsîyarî bigîrê.”
