Hatîce Polate 94î ra ver dewa Mirzû ya ke girêdayîyê Dêrsimî ya de weşîya xo ramita. 94î de dewlete bonê înan vesneyê, înan kî bar kerdo şîyê Ergan. Nika Ergan de mabênê zor û zehmetîyan de mîyan kena weye û vana: “Heşîrîya ma cinîkan nê xeleşîna.”
Hatîce Polate, weşîya xo dewa Erzinganî Ergan de terba laj û çêneka xo ra pîya ramnena. Mîyê xo estê, pîya qaytê înan kenê. 94î ra ver dewa Mirzû ya ke girêdayîyê Dêrsimî ya de weşîya xo ramita. 94î de dewlete bonê înan vesneyê, înan kî bar kerdo şîyê Ergan. Dewa verêne de kî qaytê mal û dewarî kerdêne, nika kî qaytê mîyan kenê. Hatîce Polate, weyekerdena mîyan û giranîya kar û xebatê xo ser ajansê ma rê qisey kerd.
‘Waxt waxto verên nîyo’
Hatîce Polate, verî dewa xo verene ser ma rê qisey kena û wina vana: “Ma Mirzû ra amey me. Dewa ma vesnê, ma bar kerdîme amey me. Dewa ma zaf rind bîye, dewa ma de naxir bî, biz û mîyî bî. Wisar vasî vejîyêne zanîyî ser. Vas çînîtêne, las kerdêne, girze kerdêne, vasê xo lode de nîznêne. Hegayî ramitêne, cew û genim ramitêne. Velg bî, koçen bî, herênayîş çinebî. Alifê dewarî dewa xo de vetêne. Ma nika her çi bi peran herênenîme. Dewe de der û cîranîye rinde bîye. Raya dîyîne ke dewa ma ameyê vesnayene ma bar kerd ameyme Ergan.”
‘Heyban veyekerdene karêko girano’
Hatîce Palate, qiseykerdişê xo yê pêyênî de behsê çetinîya weyêkerdena heybanan kena û wina vana: “Mîyî û varekê ma estê. Giranîya nê karî jêde mi serde manena. Bîme nêbîme zereyê nê karîderîme. Zimistan Ergan de maneme. Wisar ke bî, some ware, some ware Dilabû. Hatan Payîz maneme. Mîyan û varekanê xo çiraynenîme. Nika îtade hegayê ma çino, pêrûne her çî bi herênayîş o. Her çî pere ra beno. Zimistano, vare zaf vara. Kar girano. Zaf îdare ne keme. Kar jêde mi serdero. Hetê ra newesanê, hete ra kî sodîr sande kar kon.”
