Gullu Goktaşa ke, Erzingande dewar kena weye wesîleya 8ê Adare ra vengê cinîyan dana û vana: “Her çî destê ma cinîyan ra yena. Cinîkî mevê qe towa nîno viraştene. Xurt vinderîme.”
Gûllû Goktaşe weşîya xo dewa Erzinganî Mollakoye de terba mêrdeyê xo û lajê xo ramnena. 15 dawarê xo est ê, pîya qaytê înan kenê. Kalik û pîrikê aye verî Gola Çê Bavayî ya ke girêdayîyê Dêrsimî de weşîya xo ramita.
Gullu Goktaşe verî dewa Merteklîye de weşîya xo ramita. Kê ra feqîr bîyê, naxire weyî kerdê, hegay ramitê. Wexto ke zewejîna, bar kenê şonê Mollakoye. Uca de uncîya naxir weye kenê, hêgayan ramnenê. Gullu Goktaşe, kar û gureyê xo û cinîyan ser ajansê ma rê qisey kerd.
‘Kare xo pîya bikerîme’
Ma Gullu Goktaşe ra meyman bîme û ma waşt ke hem serê cuya xo hem kî seba kar û xebatê xo ma rê qisey bikera. Vana “Zereyê giranîye de rindekîye, zereyê rindekîye de kî giranîye est a.” Û wina domnena: “Ez verênde Merteklîye de bîya, uca de bîyane pîl. Naxirê ma est o, qaytê naxire keme. Ez û embazê xo ma pîya karê xo keme. Ez wazena ke cinîkî pêro linganê xo ser vinderê. Cinîk û camerdî jê jûminî yê. Ma verênde feqîr bîme. Heta destê mara ame amê xo rê gurîyayîme. Ma rind ke kare xo keme, nûnê xo destê xo ra vezeme. Towa nîno guretene. Dewa verenê de mesîne ma bî, naxire ma bî, pancar ramitêne, genim, cew, fîg perûne ramitêne. Şîyêne cîte, şîyêne ramitane, çînitene, ardêne, berdêne pêrûne kerdêne. Gûrîyêne û ma hatanû na roze amayme. Wisar ke ame hêgayî ramneme, amnonî yeno çîneme, payîz keme zere. Alifê xo çêde vezeme. Zereyê giranîye de rindekîye, zereyê rindekîye de giranîye est a. Kergan kenîme weye, hak çê de vejîno, ron û dorax çê de vejîno, do, çike est o çê xo de vezeme. Rusnenîme domananê xo rê. Karê xo ra heskenîme.”
‘Linganê xo ser vinderime’
Gullu Goktaşe, qiseykerdîşe xo yê peyenî de vengê cinîkan kena û wina vana: “Cinîkanê dewa xo ra vana ke ‘xirt vindêrê, linganê xo ser vindêrê. Çi kar ke est o bikerê. Keşîrê minete mekerê. Pîya bigurîyê, pîya bûre. Kes ma ser qisey mekero. Ma cinîkî, rindîye û delalîye, rindekîye vazenîme. Cinîkî mevê, qe towa nîno viraştene. Weşîye de neweşîye de pîyarîme.”
