Endamê Komîteya Rayberî yê Komela 78an Arîf Turgay bale ant peymana mabênê HSD û hukmatê demkî yê Şamî ser o û vat: “Heta ke statuyê şarê ma yê Rojava teqez bibo, ganî her çar hetê Kurdîstanî haydar bibê û ganî çimê ma Rojava ser o bê.”
Dimayê hêrişanê çeteyanê HTŞ û SMO’yî yê vera Rojava, şarê kurd û dostê înan çar hetanê Kurdîstan û xeylê welatanê dinya de vejîyayê qadan û paştî daye Rojava. Demêko de ke xoverdayîşê şarê kurdî dewam keno, 30ê çele de mabênê Hêzanê Sûrîya Demokratîke (HSD). û hukmatê demkî yê Şamî de peymanêk ameye îmzakerdene. Peymane 2ê sibate de kewt merîyetî. Sûrîye de peymane û dayîşûgirewtişanê dîplomatîk ser o pêvînayîşî dewam kenê.
Endamê Komîteya Rayber ê Komela 78an Arîf Turgayî derheqê peymane û xoverdayîşê şarê kurd ê seba Rojava ajansê ma rê qisey kerd.
‘Sefereberîya ke ameya îlankerdene ganî dewam bikera’
Arîf Turgayî dîyar kerd ke bi peymane vernîya qirkerdişî ameye girewtene û wina vat: “Eke na peymane nêbîyêne belkî mabênê kur, ereb û kêmnetewan de kaos biqewimîyayêne. Na tehluke hema zî dewam kena. Seba ke no nêbo ganî ma xoverdayîşê xo ra fekveranê. Heta ke garantîyêk nêba ganî na sefereberîya ke ameya îlankerdene, dewam bikera.”
‘Şarê kurdî seba merdimîye xover dano’
Turgayî wina dewam kerd: “Şarê kurdî seba merdimîye xover da. Demo ke şarê dinya wayîrê Şorişê Rojava vejîyenê, eslê xo de wayîrê şorişê xo vejîyenê. Şarê kurdî seba dinya xeylê bedêlê giranî dayê. Xeylê welatan de qirkerdişî ameyê kerdene. Eke ewro şarê kurdî xover bido, seba merdimîye xover dano.”
‘Babeta Rojava de şarê ma yewîyêk awan kerd’
Arîf Turgayî dewamê qiseykerdişê xo de bale ant yewîya kurdan ser o û wina vat: “Bi serran o yewîya şarê kurdî dejêko gird bi. Labelê babeta Rojava de şarê ma mabênê heme rêxistinanê kurdan de yewîyêk awan kerd. Partîyê ma yê sîyasî heme ameyê pêser, Rojava rê wayîr vejîyayî û na babete de seba yewîya kurdan averşîyayîşêko gird bi.”
Heme rêxistinanê Kurdîstanî rê vengdayîşê yewîye kerd
Turgayî qiseykerdişê xo wina qedîna: “Ganî partîyê ma yê sîyasî yê her çar hetanê Kurdîstanî cewab bidê şarî. Şar yewîya kurdan wazeno. Eke Rojhelatê Mîyanênî de ti biqewete nêbê nêeşkenê biciwîyê. Ma veng dana rêxistinanê her çar hetanê Kurdîstanî ke bilez bêrê têhet.”
