20ê çeleyî ra nat zaf rêxistinan werd, doşeg, betanîye, derman, lazimtîyê cinî û domanan û sotemenî erşawitî Rojava. Hetkarîyî hetê komîteyê vilakerdişî yê Heyva Sor a Kurd û Meclîsê Koçberan ê Efrîn û Şehbayî ra yenê vilakerdene.
6ê çeleyî de çeteyanê HTŞ û SMO’yî hêrişê taxanê Şêxmeqsûd û Eşrefîye yê Helebî kerd. Rîyê hêrişanê çeteyan ra 150 hezar koçberan verê xo da kantonê Firat û Cizîrê.
365 kamyonan ra zafêr hetkarî resayî Rojava
Heta nika 365 kamyonan ra zafêr hetkarî û 20 tank sotemenî berê Sêmalka ra ameyî Rojava. Kantonê Cizîrê de 123 merkezî (mekteb, camî, akademî, sazgeh) seba koçberan ameyî akerdene.
Rêxistinanê ke hetkarî şawitî nê yê: Acted, CARE, Blumont, Weqfa Xêrxwazîya Barzanî, Netewê Yewbîyayeyî, Tabîbê Bêsînorî, Heyva Sor a Kurde, Rêxistina Werdî ya Dinya, Yekîtîya Tabîbanê Kurdan a Almanya û zaf rêxistinê bînî.
Nêweşxaneyan rê dermanî lazim ê
Tabîbê nêweşîyanê mîyanênî û îdarekarê Beşa Tibî ya Nêweşxaneyê Şarî yê Qamişloyî Ehmed Îsa Îsayî agahî da ke hewcedarîya înan bi dermanan est a ke bi rayîrê fek û damaran yenê dayene û hewcedarîya beşê mudaxeleyê lezî est a û vat: “Nêweşîyê şekerî, zerrî ûsn. girêdayeyê nê dermanan ê. Zêdebîyayîşê hûmara koçberan zehmetî virazena, coka hewcedarîya ma bi zaf tewirê dermanan est a.”
Îsayî venga Heyva Sor a Kurd û sazgehan da ke eşkenê seba nêweşxaneyan dermanan temîn bikerê ke hewcedarîyanê nêweşxaneyan bîyarê ca.
