Prosesê Haştîye û Komelê Demokratîkî kewt hewteyo krîtîkî. Yeno pawitene ke hem komîsyonê meclîsî bêro ronayene hem zî Rayberê Şarê Kurd Abdullah Ocalanî ra vengdayîşo bîn yeno pawitene.
Goreyê Ajansê Mezopotamya xebatê ronayîşê komîsyonê meclîsî yenê domnayene û yeno pawitene ke PKK semedê ronayîşê çekan gama pratîke bierzo.
Goreyê xebere Rayberê Şarê Kurd Abdullah Ocalan do dîrek veng bido hêzanê gerîlayan. Vera nê vengdayîşî grûbêka PKK’yî do sey sembolîkî çeke rono û mîyanê nê grûbe de do îdarekarî zî bibê.
Serekê Meclîsî Numan Kurtulmuşî hewteyo ravîyarte temsîlkaranê partîyanê sîyasîyan reyde derheqê ronayîşê komîsyonî de pêvînayîş kerd. No hewte yeno pawitene ke partîyî vernîyazanê xo vajê. “Komîsyonê Haştîya Komelkî û Demokratîkbîyayîşî” yo ke yeno plankerdene bêro ronayene, hem do zemînê huqûqî yê zemînê bêçekerdişî hazir bikero hem zî gamanê demokratîkbîyayîşî bîgîro dest.
Yeno plankerdene ke grûbêka PKK’yî sey nîyetê holî merasîmê ronayîşê çekan Herêma Kurdîstanê Federelî de verê çimanê dinya de bikero. Partîyê sîyasîyî, temsîlkarê komelanê sîvîlan, medya zî do bêrê dawetkerdene. Merasîm de do mesajê “Ma semedê tewrbîyayîşê sîyasetê demokratîkî hazir ê” bêro dayene.
Averşîyayîşo krîtîko bîn zî rojanê verê ma de Heyetê Îmraliyî yê DEM Partî û Serekkomar Erdogan do derheqê prosesî de pêvînayîş bikerê.
CHP zî paştî dano prosesî. Paştdayîşê mûxalefetî wina yeno erjnayene ke proses do serê zemînê meclîsî de hol bêro averberdene.
Rojanê verê ma de hem vengdayîşê Rayber Apoyî yo ke yeno pawitene hem zî gamê pratîkî yê PKK’yî prosesî do aver bêro. Vera nê gaman hukmatî ra gamê sîyasî û huqûqî yê pêtî yenê pawitene.
