Hemsereka Şaredarîya Peyasî Bêrîvan Gulşen Sîncar heyetêk reyde çarçewaya rêzepêvînayîşê fermî de Swêd de rayberanê merkezê zafziwanî yê Şaredarîya Vesterasî ziyaret kerd.
Hemsereka Şaredarîya Peyasî ya Amedî Bêrîvan Gulşen Sîncar û heyetê şaredarîye reyde çend rojî yo Ewropa de rêzepêvînayîşan kenê. Hemserekê Peyasî Bêrîvan Gulşen Sîncar û heyetêko pîya şîyî, Swêd de merkezê zafziwanî yê Şaredarîya Vesterasî ziyaret kerd.
Perwerdeyê bi 48 ziwananê cîyayan
Zîyaret de ama eşkerakerdene ke nê merkezê mîyannetewîye de 4500 wendekarî 48 ziwananî cîyayan reyde perwerde vînenê. Ame îfadekerdene ke nê merkezî de 160 mamostayî wezîfedar ê û derse bi ziwananê kurdkî û erebî danê. Zîyaret de ame dîyarkerdene ke merkez de giranîyêka zêde perwerdeyê ziwanê dayîke ser o est a. Perwerdeyê ziwanê dayîke, verwendegeh ra heta lîse dewam keno û 18 mamosteyê kurdî perwerdeyê ziwanê kurdkî pêşkeşê 800 wendekaran kenê.
Modelê perwerdeyî ser o agahî
Wezîfedarê merkezî Liselotte Dahlberg-Jakobsson û cargirê ey Sarî û Asa Ewertson, xebatanê merkez û modelê perwerdeyî ser o dergaderg agahî dayê heyetê Şaredarîya Peyasî. Zîyaretî de nuştox û mamosta Haydar Diljen û Mehmûd Lewendî zî amade bîyî û detayê xebatanê merkezî ser o û muhîmîya nimûneyanê serkewte yê perwerdeya kurdkî zanistî pare kerdê.
Muşahadekerdiş seba ‘Zarokîstanan’
Hemserek Sîncar û heyetî pîya sinifê perwerdeyê kurdkî zî ziyaret kerdê û nêzdî ra muşahadeyê prosesê musayîşê wendekaranê kurdî (verwendegeh, wendegeho mîyanên û lîse) kerdê.
Ame eşkerakerdiş tecrubeyê ke merkezî de amê destkerdiş, do seba rayberîya cayî û bi taybet seba Zarokîstan û merkezê kreşan ê Şaredarîya Peyasî bibê nimune û çimeyê muhîm ê zanistî.
