Endamê Platformê Pawitiş û Paştîdayîşî yê Şaristanî yê Amedî ke Anqara de têkilî ronayî, dîyar kerd ke înan tersê komelî partîyan rê îfade kerdî û va ke seba proses bibo komelkî do xebatanê xo bidomnê.
Platformê Pawitiş û Paştîdayîşî yê Şaristanê yê Amedî, çarçewa munaqeşeyanê çareserîya meseleyê kurdî de 27-28ê çele de şîyê Anqara û partîyanê sîyasîyan ê meclîsî reyde têkilîyî viraştî. Heyetê platformî yê 7 kesan, partîyanê ke meclîs de temsîl benê rê pêşnîyazê 10 nuqtayan pêşkêş kerd. Endamê Komîteya Rayberîya Platformî Mahsum Çîya Korkmaz û Serdar Keskîn, derheqê zîyaret û xebatanê xo de Ajansa Mezopotamya (MA) rê qisey kerd.
Têkilîyê muhalefetî
Mahsum Çîya Korkmaz vat ke înan qerarê têkilîyanê partîyanê ke meclîs de temsîl benê aşma sibate ya 2024î de Amedî de kargeha “Gêrayîşê çareserîya demokratîke ya meseleyê kurdî” de ke rêxistinanê sivîlan reyde viraşto, girewto. Korkmaz qeyd kerd ke ÎYÎ Partî û MHP ra teber heme partîyan randevu dayo û ÎYÎ Partî zî agêrayîşê xo yê Amedî ra dima cewab dayo.
Korkmazî vat ke CHP ra weçînayîşanê herêmkîyan de vejîyayîşêko baş ameyo kerdene la derheqê mesela kurdî de polîtîkaya qewetine nêvirazîyaya. Ey va: “Ma vat ke tayê vatişî şarî tersnenê û ganî hîna zêde bi cesaret bibê.”
AKP’yî rê tersê şarî ameyî vatene
Korkmazî vat ke AKP reyde di têkilîyî viraştê û Serekê Grûba AKP’yî Efkan Ala reyde zî qisey kerdo. Korkmaz îfade kerd ke înan 10 nuqtayê ters û waştişê xo înan rê zî vatî û va: “Ma waştişê komelî û çîyê ke ganî bibê, înan rê vatî. Ma tersê xo yê derheqê vindertişê muhtemel yê prosesî de îfade kerdî. Înan vat ke ê nê tersan fehm kenê û do nê tersan bigîrê çiman ver.”
Têkilîyî do dewam bikerê
Korkmazî vat ke amancê înan o yo ke waştiş û tersanê komelî biresnê înan û waştbî ke nê meseleyan de tena partîyê sîyasî nê, heme rêxistinanê sivîlan reyde zî têkildar bibê. Korkmaz dîyar kerd ke xebatê înan do dewam bikerê û do kargeh virazê û do sîyasîyan û kesanê cîya-cîyayan reyde qisey bikerê.
‘Ma prosesî ra hêvîdar ê’
Serdar Keskînî vat ke her çiqas nika rewşa ‘bipawê-bivînê’ est biba zî ê prosesî ra hêvîdar ê û vat ke dewletî problemanê şarê xo her tim bi maseyê dîyalogî de çareser kenê. Keskîn qiseykerdişê xo wina qedêna: “Proseso ewroyên ra ma hêvîdar ê. Ma do sey rêxistinê sivîlan çîyê ke ma dest ra yeno bikerê ke no proses bibo aştîya daîmî.”
