Serekê Heyva Sor a Kurd Dilgeş Îsayî da zanayene ke 5 xebatkarê înan ê taxa Şêxmeqsûdî demo ke karê xo kerdêne getê çeteyanê HTŞ û SMO’yî ra ameyê remnayene û vengda sazgehanê mîyanneteweyî ke seba ke endamê înan bêrê veradayene bikewê dewre.
Çeteyê girêdayeyê HTŞ û SMO’yî 6ê çeleyî de hêrişê taxanê Şêxmeqsûd û Eşrefîye yê Helebî kerd. Hêrişan de xeylê sîvîlî ameyê kiştene û se hezar welatijî keyeyanê xo ra ameyê koçberkerdene. Endamê Heyva Sor a Kurd zî roja destpêkê hêrişan ra heta roja vengkerdişê taxan qade de seba hetkarîya weşîya şarî xebitîya. 8ê çeleyî ra pey 5 endamanê Heyva Sor a Kurd ê taxa Şêxmeqsûdî ra agahî nêameye girewtene û ame zanayene ke ê endamî ameyê remnayane.
Ê ke ameyê remnayene ekîbê weşîye bîyê
Serekê Heyva Sor a Kurd Dilgeş Îsayî dîyar kerd ke 8ê çeleyî de demo ke ekîbê înan waşto sîvîl û birîndaran herêma şerî ra vejê, ameyê remnayeneû vat: “Têkilîya ma ekîba ma reyde qut bîye. Ma taqîb kerd ke endamê ma welatijanê taxa Şêxmeqsûd reyde ameyê remnayene û nika destê çeteyanê girêdayeyê HTŞ û SMO de yê.”
Nasnameyê 3 xebatkaran eşkere bîyê
Dilgeş Îsayî dîyar kerd ke înan nasnameyê 3 xebatkaranê ke ameyê remnayene eşkera kerdê û nê çîyî vatî: “Goreyê agahîyanê ke ma girewtê, 2 endamî ke ma nasnameyê înan dîyar nêkerdo, bi temamî 5 xebatkarê ma girewte yê. Nameyê endamanê ma yê ameyê remnayene wina yê: “Yûsiv Henan Hemoko (Şofêrê Ambûlansî)’, ‘Ebdo Mihemed Mihemed (Hemşîr)’, Ramî Hisên El-Elî (Berpirsê Nûqtaya Weşîye yê Şêxmeqsûdî).”
‘Berpirsîyar hukmatê Şamî yo’
Dilgeş Îsayî gumanê xo yê cuya xebatkaranê weşîye ser o pare kerdê û wina vat: “Sucê vera ekîbê weşîye û şarê a taxe, ameyo daraxê sucê şerî. Eke zerar bireso cuya xebatkaranê weşîye, berpirsîyarê ney hukmatê Şamî yo.”
Dilgeş Îsayî dewamê qiseykerdişê xo de bale ant texrîbatanê taxanê Şêxmeqsûd û Eşrefîye yê Helebî ser o û wina qisey kerd: “Nêweşxaneyê Xalid Fecer ê taxa Şêxmeqsûd bi hewayêko hovane ameyo topbarankerdene û xebatkarê weşîye binê şert û mercanê zehmet de xizmet kerdo. 119 birîndarî herême ra ameyê vetene, nêwşxaneyê Vakur û Rojhelatê Sûrîye de yenê dermankerdene û 10 birîndarî zî seba dermankerdişî vîyartê nêweşxaneyanê başûrê Kurdîstanî.”
‘Ma seba hetkarî her tim amade yê’
Peynîya qiseykerdişê xo de Dilgeş Îsayî bale ant şero ke dewam keno ser o û wina dewam kerd: “Vemgdayîşê ma o yo ke şer bêro vindarnayene. Ma sey Heyva Sor a Kurd tehlukeyê koçberî vînenê, tehlukeyê şer ê giranî vînenê. Nika lazim o ke Sûrîye aram biba. 15 serrî yo ke herême û temamê Sûrîye mîyanê şerî de ya. Xeylê koçberî bîyê. Nika Vakur û Rojhelatê Sûrîye de 10 kampê koçberan est ê. Bi rastî zî herême de rewşêka zehmet a heyatî est a. Xeylê netewî zereyê Sûrîye û Vakur û Rojhelatê Sûrîye de ciwîyenê. Eke herême de hêrişî dewam bikerê do koçberî zî vêşî biba. Dinya nêeşkena hesabê ney bida. Nê semedî ra sey Heyva Sor a Kurd ma nêwazenê şer bêro vindertene. Seba xelesnayîşê birîndaran, mudaxeleya lezgîn, xizmetê komelê xo ma karê xo ser o yê. Ma her tim seba hetkarî amade yê.”
Sazgehanê mîyanneteweyî rê vengdayîş
Dilgeş Îsayî vengda sazgehanê wezîfedar ke wa seba pawitişê xebatkaranê weşîye yê ameyê remnayene bikewê dewre û wina dewam kerd: “Komîteyê Mîyanneteweyî yê Xaça Sûre (ICRC), Neteweyê Yewbîyayeyî (NY), Ofîsê Koordînasyonî Karanê Merdimî (OCHA) û Heyva Sor a Erebî ya Sûrîye (SARC) wa wezîfeyê xo bîyarê ca.
