Endamê OHD’yî Avûkat Rojger Ant derheqê heqê hêvî de vat ke qeraro ke seba Rayberê Şarê Kurdî Abdullah Ocalanî ameyo dayene, babeta bazarî nîya û ganî Tirkîya bi lez Heqê Hêvî nas bikera.
Endamê Komela Huqûqnasanê seba Azadîye (OHD) û Rayberê DEM Partî yê Cizîrî Rojger Nuh Antî derheqê qerarê heqê hêvî ke kewto rojevê Komîteyê Wezîranê Konseyê Ewropa de vat ke konsey qerarê mabênê 15 û 17ê êlule de bido baş beno û lazim o Tirkîya zî bi lez nê qeraran bîyara ca.
‘Seba ke Tirkîya ameya mehkumkerdene, na babeta munaqeşe nîya’
Rojger Ant dîyar kerd ke vengdayîşê Rayberê Şarê Kurdî Abdullah Ocalanî ê 27ê sibate heqê hêvî kewt rojevê raya pêroyî û qiseykerdişê xo wina domna: “Na babetêka merdimîye ya û nêbeno ke prosesê çareserî ra girêdaye biba babeta bazarî. Seba ke Tirkîya na babete de ameya mehkumkerdene.”
22 serrî yo têkoşînê heqê hêvî yeno dayene
Rojger Antî qeraro ke 11 serrî ra ver derheqê Rayberê Şarê Kurdî Abdullah Ocalanî de ameyo dayene, ard vîr û wina vat: “22 serrî yo pawitişê heqê hêvî avûkatê têkoşîn danê. 22 serrî yo avûkatê Birêz Ocalan seba heqê hêvî têkoşîn danê. Na babete ewro kewta Komîteyê Wezîranê Kosnseyê Ewropa. Tirkîya de reya ewil bi zîyaretkerdişê Ocalanî reyde Tirkîya ameye mehkumkerdene. No Tirkîya de qeraro yewin o. Dima xeylê zîyaretî bîyê û nika nêzdîyê 4 hezar girewteyî paweyê ke no heq bikewo merîyet.”
‘Lazim o Birêz Ocalan bireso azadiya fîzîkî’
Rojger Antî tewr peyên da zanayene ke goreyê rewşa sîyasî nêzdîyê qerarî bena û wina qedîna: “Çi heyf ke ma na babete prosesê aştî de qisey kenê. Na babete babetêka winasîn nîya ke ma prosesî reyde girêbidê. No 11 serrî yo Tirkîya ameya mehkumkerdene. Ma reyna vanê. Babeta heqê hêvî babeta munaqeşe û bazarî nîya. Ganî sere de Birêz Ocalan û girewteyê bînî biresê azadîya xo ya fîzîkî.”
