Avûkat û sosyologo marksîst John Hollowayî vat ke mumkun o marksîzm bi formê cîyayan bêro girewtene û ewro newe bibo û ard ziwan: “Nê hetî ra teorîya Abdullah Ocalanî kena ke fîkrê îhtîmalê şorişî reyna bêro fikirîyayene.”
Fîlozof û sosyologo marksîst John Hollowayî ke bi nêzdîbîyayîşê xo yê rexnekar ê vera marksîzmê klasîkî yeno naskerdene, îfade keno ke herinda ke îqtidar bibo hedef, ganî dinya bêro bedilnayene. Hollowayî ke bi serranê dergan têgêrayîşê Zapatîstayan etud kerdo û 12 serran ra ver Têgêrayîşê Kurdan nas kerdo, vano ke her di têgêrayîşî zî bi rêxistinbîyayîşê şarî û komelî yo ke alternatîfê dewlete têkoşîn kenê.
Hollowayî vat ke wendekarê xo yê doktora Azîz Arslanî seba fehm kerdişê meseleya kurdan piştîya girse daye ey. Hollowayî îfade kerd ke xebatê ke bi Arslanî reyde kerdî, ey kerd ke mewzû ra haydar bibo.
Hollowayî vat ke Têgêrayîşê Zapatîstayan û Têgêrayîşê Kurdan manenê yewbînan û her dîyan zî bi rêxistinbîyayîşê şarî û komelî yo ke alternatîfê dewlet o, têkoşîn kenê: “Abdullah Ocalanî reyde zaf nuqteyan de ma eynî fikrî de yê. Ez paradigmaya konfederalîzma demokratîke ya ke perspektîfê komunbîyayîşî yo vera dezgeha dewlete, etud kena û ez bi temamî pêşnîyazanê ey ra razî ya. Têgêrayîşê Zapatîstayan û teorîya Abdullah Ocalanî bi têkoşînê Têgêrayîşê Kurdan, kenê ke fîkrê îhtîmalê şorişî reyna bêro fikirîyayene. Seba nimune Rojawan eşkeno vera sîstemê kapîtalîstî modelêk virazo. Bingeyê komunalî ser o viraştişêko newe yê komelî, vurîyayîşê komelkî yê ke merkezê ey cinî yê û ekonomîya kooperatîfe ya vera kapîtalîzmî, nê zaf muhîm ê.”
Hollowayî vat ke destpêkerdişê prosesêko newe yê Tirkîya de derheqê çareserîya haştîyane û demokratîke ya meseleya kurdan de, ey mat keno: “Bi taybetî wexto ke şertê tecrîdê ke Abdullah Ocalan tede yeno tepîştene û tewirê otorîterê hukmatê tirkan bêro hesibyayene, mi no averşîyayîş nêpawitêne. Labelê goreyê mi averşîyayîşêko zaf rind o. Ez vînena ke Têgêrayîşê Kurdan zaf hîna qayîl o ke gaman bierzo, hukmatê Tirkîya de meylo pêt ê pawitişê statukoyî est o.”
