Hunermend Dîyar Dêrsim, ser hunerê û berardişê “Senfoniya Welatî” ke muzîka ci hadre kerdo vat ke eserê ci vengê Yewîyeya Neteweyî keno û dîyar kerd ke hunermend wijdanê komelî yo.
Diyar Dêrsim hunermendêkî Kurd o ke 1ê Teşrîna 1966î de dewa Hêwedanê bi ser qezaya Mêzgirî yê Dêrsimî ra girêda ameyo dinya. Hozan Diyar endamêkî Koma Berxwedan bî û bi Koma Berxwedan ra bi desan album viraşto. Bi tena serê xo zî heta nika 12 album û zafêr “single” viraşto. Diyar Dêrsim hetanî roja ewro zafêr welat û herêman û parzemînan de konser pê ardo û bi stîlê xo yê folklorîk ca, zerrîya şarê Kurd de girewto. Hozar Dêrsim her wina bi nêzdîbîyayişê xo yê şorişgerî û welatperwerî zî yeno şinasnayiş.
Tev-Çand Ewropa bi nameyê “Welat” deyîrêko senfonîk ke zafê hunermendê Kurd mîyan de ca gênê hadre kerd. Vatişê deyîrê sîyasetmedarê hepsî Selahattîn Demîrtaş nuşto, muzîka ci Diyar Dêrsimî hadre kerdo. Deyîr bi awayê senfonîkî ameyo hadrekerdiş ke hunermendê namdar Grzech Piotrowski aver berdo. Hunermend Nasir Rezazî, Diyar Dêrsim, Hozan Comert, Şehrîbana Kurdî, Dengbêj Kazo, Deniz Deman, Narîn Feqe, Kîjan Xeyat, Elind bi vengê xo mîyanê xebate de ca girewtê.
Bi rayberîya Kongreya Neteweyî ya Kurdistanî (KNK) û Enstîtuya Kurdî 6ê Kanûne de şaristanê Brukselî de bi galayêko bi coş album ame nîşan dayiş.
Hunermend Diyar Dêrsim Ajansê Welatî rê qise kerd û vat ke bi pêroyî o eşkeno bivajo ke no proje serkewt bîyo, tay çik nê goreyê zerrîya ey bîyê û wina vat: “Hewna zî ez sey projeyêko serkewte vîneno. Seba ke hetanî nika hetê şar ameyo elaqadîyîş. Demê ma klîp weşîna û hetanî roja ewro, heme roşnvîran, hunermendan, goştaritan, herkesî, kam mi gêra bi hestêko netewî înan de viraşto. Her kesî bi vatişî no serberzîya ma ya netewî ya. Ma zaf bi kêfweş bîyê. No zî seba mi serberzîyêka gird a.”
Diyar Dêrsim wina domna: “Hewna ez vana, ganî hunermend bi wijdan bibo. Seba ci ez nêeşkena vîr bikera ke nika roja ewro koyanê Kurdan bi desan, bi seyan xort û kêna, seba ke ma bi rûmet biciwî, seba ke ma mîyanê dinya de bibê wayîrê heq, her roj şer kenê. Nê kesan canê xo danî seba ma, no ser ganî ma wayîrê înan bivejê. Cinîyê Kurdistanî ewro seba dinya heme bîyê îlhamêko gird. Çepgirê dinya, wijdanê dinya, komelê sosyalîst, her kes meşê înan ê azadîye ra îlham gênê.”
