Koordînasyonê Hîlala Zêrîn eşkera kerd ke Nîhal Ay (Sîdar Andok) Rojava de cuya xo vîndî kerda û aye yad kerd.
Koordînasyonê Hîlala Zêrîn eşkera kerd ke Nîhal Ay (Sîdar Andok) a ke serra 2005î de Amed de tewrê xebatanê kultur û hunerî bîye û dest bi raywanîya têkoşînê azadîye kerd, serra 2025î de demo ke mîyanê Têgêrayîşê Hîlala Zêrîn de xebitîyayêne, cuya xo vîndî kerda.
Têgêrayîşê Hîlala Zêrîn keyeyê Ay û şarê kurdî rê serweşîye waşte. Eşkerayî de wina ame vatene:
“Hemraya ma Sîdar serra 1987î de qezaya Farqînî de ameya dinya. Kênaya ê keyeyî ya ke bedêl dayo û girêdayeyê kulturê Kurdîstanî û erjanê welatperwerî yo. Pîyê aye Abdullah Ay serra 1992î de hetê hîzbulkontrayan ra ke girêdayeyê dewleta xorînî ye ameyo qetilkerdene. Hemray Sîdar dima ke pîyê xo emrêko şenik de nas kerdo, berpirsîyarê girewta xo ser. Emrêko şenik de vînena ke azadîye bi bedêlanê giran bena û serranê ameyoxî de no vîrê aye beno wayîrê cayêko bi kok.
Hemray Sîdar demo ke keyeyê aye dewe ra koçê qezaya Pasûrî keno, dest bi ferqkerdişê cîyayîya mabênê cuya dewe û şaristanî kena. Zîhnîyetê aye yo welatperwerî yo xozayî, jêhatîbîyayîşê aye yo hunerî beno wesîle ke hemray Sîdar serra 2005î de tewrê xebatanê Merkezê Kulturî yê Dîcle-Firatî biba. Aye warê kultur û hunerî de hem erjê neteweyî û hem zî nasnameyê cinîyan mojneno. Nê bingeyî ser o herêma Rojava de zî kedêka girde daya. Hemray Sîdar ke tewr peyên herêma Rojava de cayê xo xebatanê Hîlala Zêrîn de girewt, serra 2025î de şehîd bîye. Sey Têgêrayîşê Kultur û Hunerî yê Hîlala Zêrîn, ma soz danê ke ma do mîraso ke hemray Sîdar zerrî û zîhnîyetê ma de verdayo, gandar verdê û her qade de têkoşînê aye xurt bikerê.”
Cuya Nîhal Ay
Nîhal Ay serra 1987î de qezaya Farqînî ya Amedî de maya xo ra bena. Keyeyê Nîhal Ay serranê 1990î de riyê tedayanê dewlete ra bêçare maneno ke koçê merkezê Pasûrî bikero. Nîhal Ay desan xebatanê kultur û hunerî yê vakurê Kurdîstanî de ca girewtêne û aye kaykeranê rêzefîlmê “Ax û Jîyan” ra yew bîye. Aye hem warê tîyatroyî de hem zî warê deyîrbazî-muzîkjenî de xebitîyayêne.
