Sazgehê kultur, huner û edebîyatî venga heme hunermendanê kurdan da û vat: “Goreyê vindertiş û peymê welatperwerîya raştikêne ke Bavê Teyarî ronaye, her qade ke tede yê, bi na berpirsîyarîye bivurîyê û bi rolê xo yê pêşengîye her wextî ra xurtêr bibê û bi hunerê xo bibê vengê şarê Kurdîstanî.”
Têgêrayîşê Kultur û Hunerî yo Demokratîk ê Mezopotamya (TEV-ÇAND), Têgêrayîşê Hîlala Zêrîne yê Kulturê Cinîyan, Heyetê Kultur û Roşinvîrîye, Meclîsê Edebîyat û Yewîya Hunermendan vernîya Merkezê Kultur û Hunerî yê Mihemed Şêxo yê bajarê Qamişlo de eşkerayî daye.
‘Rolê hunermendan rolê pêşengî yo’
Eşkerayîye de qala têkoşînê Kurdîstanê Rojawanî de bîye û ame vatene: “No têkoşîn xoverdayîşêko eskerî û sîyasîye ra zêdeyêr, îfadeyê estbîyayîşê şarê kurdî yo. Rolo ke hunermendanê kurdan kay kerd, rolo dîyin nebî, rolo tarîxî, sereke û pêşengî bî. No vindertiş û tepşê hunermendanê kurdan newe nîyo. Ayaz û Erdelanan ra heta Hozan Sefkan, Hozan Mîzgîn, Hozan Serhed, Sarya Baran, Xelîl Dag, Delîla, Sîpan, Berçeme û Bavê Teyar û bi seyan hunermendê kurdî yê her çar parçeyanê Kurdîstanî, vernîya înkar, qirkerdiş û zulmê ke şarê kurdî ser yeno rayraberdene, xeta hunerê raştî bi peymê etîk û estetîkî no vindertiş xo de dîyar kerd û awan kerd.”
‘No vindertişêko exlaqî û tarîxî yo’
Eşkerayîye de sewbîna ame dîyarkerdene ke Kurdîstanê Rojawanî de zaf hunermendan seba pawitişê erd, şar û rûmetê şarê xo enstrûmanê xo ronayî û çekî girewtî xo dest. Ame vatene: “Na nakokîya huner û vindertişê hunermendan re nîya. Nîşanê ey raştîye yo ke nê erdan ser o hunero raşt senî yeno kerdene. Çunke nê erdan ser huner cuye ra cîya nîyo; bi xo awankerdoxê pawitişê cu yo.”
Peynîya eşkerayî de vengdayîşê heme hunermendanê kurdan ame kerdene ke goreyê vindertiş û peymê welatperwerîya raştikêne ke Bavê Teyarî ronaya, her qada ke tede yê bi na berpirsîyarîye hareket bikerê; seba mîletê demokratîk û yewîya neteweyî bi rolê xo yê pêşengîye her wextî ra xurtêr bibê û bi hunerê xo bibê vengê şarê Kurdîstanî.
