ÎHD’yî Îzmîrî û Baroyê Îzmîrî vernîya Edlîyeya Îzmîrî de eşkerayîyêk daye û wina vat: “Heta ke ma piştperdeyê serebûtî zelal bikerê, ma do bibê taqîbkerdoxê dewa.”
Hemserekê Verênî yê Şubeyê ÎHD’yî yê Îzmîrî Alî Aydinî, rayîro ke her roje tira vîyareno, uca de netîceyê hêrişêkî de cuya xo vîndî kerd. Şubeyê Komela Heqanê Merdiman (ÎHD) yê Îzmîrî û hemmeslekî Alî Aydinî derheqê hêriş û rewşa peyêne ya dewa de vernîya Edlîyeya Karşiyaka de eşkerayîyêk daye.
Eşkerayî de keyeyê Alî Aydinî, Hemserekê Şubeyê ÎHDyî yê Îzmîrî Cîhan Aydin, Serekê Baroya Îzmîrî Sefa Yilmaz, Hetkarê Hemserekanê Pêroyîyan ê DEM Partî Ozturk Turkdogan, temsîlkarê partîyanê sîyasîyan, temsîlkarê sazîyanê sivîlan û xeylê kesî tewrê eşkerayîye bîyî. Eşkerayîye de sloganê “Alî Aydin rûmetê ma yo”, “ÎHD bêveng nêmaneno û nêmaneno” ameyî berzkerdene.
Versûc ame girewtene
Sefa Yilmazî bal ant heqê pawitişî yê Alî Aydinî ser û wina dewam kerd: “Demê ke serebût qewimîya ra nata ma serebûtî nêzdî ra teqîb kenê. Na çarçewa de malûmatanê ke ma dest fînenê, ma meqamanê muxataban reyde pare kenê. Ma teqîbkarê serebûtî yê, herçiqas bi nê kiştişan wazenê ma biterisnê zî ma do dest doza xo ra nêancê.”
‘Ma têkoşînê heqîqetî danê’
Cîhan Yilmazî zî dîyar kerd ke bi serran o rîyê kiştişanê faîlê ci meçhulan ra ê verê beranê edlîyeyan de yê û nê çîyî ardî ziwan: “Ewro zî ma seba heqê pawitişî yê biqiymetî tîya yê.”
Tewr peynî de Hetkarê Hemserekanê Pêroyîyan ê DEM Partî Ozturk Turkdoganî qisey kerd û wina va: “Ma Alî Aydinî reyde bi serran mîyanê têkoşînê pawitişê heqan de bîyî. Alî, avûkatê heqîqet û edaletî bi. No ser ma xover danê.” Çalakîye bi sloganan qedîyaye.
