Sîyasetmedaro swîsreyij Ilias Panchardî îfade kerd ke helwêstê dewleta tirke yê vera prosesî qebul nêbeno û vat: “Ocalan Mandelayê kurdan o. Bê azadîya ci çareserî nêbena.”
Endamê Meclîsê Şaredarîya Lozanî yê Partîya Keske Ilias Panchardî ANFyî rê qisey kerd û vat ke vengdayîşê “Haştî û Komelê Demokratîk” ke 27ê sibate 2025î Rayber Apoyî kerd, berê dewrêko newe yê çareserîya kurdan a demokratîke akerd, la heta ewro hetê dewleta tirke ra gamê şênberî nêerzîyayî, no zî bîyo merkezê rexneyan.
Panchardî vat ke o şikdar û bidîqet o: “Seba ke ez sîyaset de bawer biba, gamê eşkereyî û averşîyayîşê heqîqî gere bibê. Bi taybetî helwêstê emperyalîstî yê hukumatê Erdoganî ke bi serran o mojneno û dek û dolabê dihetî ke şuxulneno, mi dîyî ez nê wextî de tu hewa bawer nêkena.”
Panchardî seba persa ke gamê Têgêrayîşê Azadîya Kurdan ê haştî û çareserîya demokratîke senî nirxneno, vat ke no desto ke ame dergkerdene û îradeyê neweçinitişê prosesê haştîye tam nika vejîya, ey tay heyret kerd, bi taybetî zî rewşa Rojavanî de. Panchardî vat: “No, mîyanê rewşa mîlîtarîzasyon û şîdetê herême de jestêko xurt o. La gere ez vajî ke êdî tu vejîyayîşêko bîn nêmendo. Çareserî ti zanî ke çekan ra nîna; xoverdayîş çîyêko bîn o, rayîrê vejîyayîşê sîyasî zî her çiqas ke zehmet bo zî, çîyêko bîn o.”
Panchardî cewab da persa, “Rolê Rayber Apoyî prosesê haştîye de senîn ca gêno?” no derheq de zî wina vat: “Her çiqas rewşa Ocalanî raya pêroyî ya mîyanneteweyî de qasê Mandelayî nas nêbo zî, mumkin o ke o sey Mandelayêkê kurdan bêro nirxnayene, heta gere wina bêro nirxnayene. Tabloyêko wina est o: dûrî ra tepiştişêk o la bi serran o destê ke ver bi haştîye yenê dergkerdene, û berhemkerdişêko entelektuel û sîyasî yo ke bi serran o dewam keno.”
Panchardî vat ke azadîya Ocalanî seba destpêkerdişê dîyalogêko heqîqî û prosesê haştîye yê heqîqî, şertê tewr verênî yê ke nêno caverdayene. Panchardî vat: “Bê tu garantîya derheqê veradayîşê Ocalanî de, ramitişê prosesêko haştîye yo hîra mumkin nîyo. Ocalanî ke hepisxane ra muzakere rameno, no çin o. Ez bawer kena ke herkes naye ferq keno.”
Panchardî dîyar kerd ke Yewîya Ewropa û Swîsre gere nê prosesî de berpirsîyarî bigîrê, û vat ke berpirsîyarîya Yewîya Ewropa gird a. Panchardî vat ke tay rêberê ewropî hema zî hewnê beşdarîya Tirkîya ya Yewîya Ewropa vînenê, û nê rêberî helwêstê faydeyî ra teber nêvejîyenê, bi taybetî zî demê krîzê penaberanê Tirkîya.
