Serekê Pêroyî yê Miletanê Yewbîyayeyan (MY) Antonîo Guterresî Îranî ra waşt ke cezayanê dardekerdişî bivindarno û qanûnê ke cinîyan teber ra veradanê, wedarno.
Serekê Pêroyî yê MY’yî Antonîo Guterresî, derheqê binpaykerdişê heqanê însanan ê Îranî û Rojhelatê Kurdîstanî de raporêk weşana. Raporî de Îranî ra ame waştene ke cezayanê dardekerdişî bivindarno, tepişteyanê sîyasîyan û kesanê ke bi hawayêko keyfî ameyê tepîştene azad bikero û îşkence bivindaro. Sewbîna ame waştene ke qanûnê ke cinîyan teber ra veradanê, wedarno.
Tedayî zêde bîyê
Goreyê raporî, badê pêkewtişanê 12 rojan ê mabênê Îran û Îsraîlî tedayê vera bahaîyan, kurdan, belûcan û ereban zêde bîyî. Îşkenceyê tepîşteyanê sîyasîyan zî ame îfadekerdiş. Raporî de ame dîyarkerdiş ke cezayê bedenî û qamçîkerdiş eşkera binpaykerdişê heqanê însanan o.
Bi îthamanê “zîna” cezayê girsî
Guterresî dîyar kerd ke sîstemê dadgehe yê Îranî demanê peyênan de bi taybetî bi îthamanê “zîna” cezayanê girsan dano, tepîştişê keyfe, muhakemaya neadîle û cezayê dardekerdişî zêde bîyî. Sewbîna ame vatene ke qanûnnameyê ke bi îthamanê “zîna” cezayan zêdeyan dano, azadîya îfadekerdişê fikran û û heqê înternetî ser o tehdîdêko girs o.
Bi hezaran kes ameyî dardekerdene
Raporê MY’yî, goreyê melumatanê rêxistina heqanê însanan a Hana virazîyayo. Goreyê naye, serranê peyênan de Îran û Rojhelatê Kurdîstanî de tewr kêmî 1.537 kesî ameyî dardekerdene. Sewbîna, goreyê raporê Kampanyaya “Roja Sêşemeyî Dardekerdişan Rê Ney” destpêkê serre ra heta nika Îran û Rojhelatê Kurdîstanî de 1.087 kesî ameyî dardekerdene.
