Vizêrî şan ra Silêmanî de hêrişê vera bano ke verî Neteweyanê Yewbîyayeyî tede mendêne ame kerdene û Hewlêr de zî hêrişê usê PAK’î ame kerdene.
Goreyê xebera RojNewsî çendêk raver hêrişê vera nê banî yo ke verî Neteweyanê Yewbîyayeyan (NY) bi Girê Rîaye yê Silêmanî de yo, ameyo kerdene. Heta nika kes nêzano ke hêriş bi fuzeyan yan zî dironan ameyo kerdene. Nêno zanitene ke hêriş rasterast hetê kamî ra yan zî kamcîn grûbe ra ameyo kerdene zî. Heta nika sazgehanê ewlekarî no derheq de qet agahdarîye nêkerda. Derheqê zerar û zîyanî de zî agahdarîye nêameya kerdene.
Reyna goreyê çapemenîyanê herême rejîmê Îranî bi dironanê xokiştoxan Hewlêr de hêrişê qerargehê Partîya Azadî ya Kurdîstanî (PAK) kerd. Ame zanitene ke wexto ke hêriş ameyo kerdene, hêzê leşkerî yê PAK’î qerargehê xo de bîyê. Goreyê resmanê ke ameyê parekerdene, qerargehê PAK’î adir girewto. Heta nika derheqê zerarî de agahî nêameyê dayene.
