Muxabirê ma Nedîm Oruç 17ê çele de amebi girewtene. Avûkatê Oruçî, Resul Tamur îtîrazê girewtişê miwekîlê xo kerd. Mehkemaya Şirnexî îtîraz red kerd û qerar da ke Oruç girewte bimano.
Muxabirê Ajansê Welatî Nedîm Oruç roja 14ê çele de Cizîr de wextêko xebere taqîb kerdêne, hetê polîsan ra bi pirodayîş ame destbendkerdene. Oruç badê hîrê rojan 17ê çele de bi îdiaya “propaganda rêxistine kerda” hetê Mehkemaya Cezayê Sulhî ya Şirnexî ra ame girewtene.
Avûkatê Oruçî, Resul Tamur badê girewtişê miwekîlê xo bi waştişnameyêk muracatê Mehkemaya Sulhî ya Şirnexî de îtîrazê girewtişî kerd. Mehkema 21ê çele de îtîraz erjna û bi mazaretê ke “girewtişê ey vera huqûqî nîyo” îtîrazî red kerd û qerar da ke Oruç girewte bimano.
Redkerdişê îtîrazî 5ê sibate de teblîxê avûkat Resul Tamur ame kerdene.
