Duran Kalkanî îfade kerd ke ganî Rayber Apo zî heyetê ci zî bêrê berdene bi Meclîsî û bêrê goşdarîkerdene. Kalkanî vat ke heta ke Rayber Apo Îmrali de sey rehîne bitepişîyo komîsyon do nêeşko aver şoro.
Endamê Akademîya Zanistanê Komelkîyan a Abdullah Ocalanî Duran Kalkanî Medya-Haber TV’yî de rojdem ercna.
Qiseykerdişê Kalkanî ra tayê noqtayê girîngî wina yê:
“25 rojan ra nata Rayber Apoyî de pêvînayîş nêro kerdene. La ma wina pawitêne ke tecrîd bi temamî wedarîyo. Her kes demokrasî û azadîye wazeno û zaneno ke nê bi azadîya Rayber Apoyî mumkîn ê.
Komîsyonê Meclîsî karê xo nika bi cidîyetî keno. Rayber Apo garantîyê prosesî yo. PKK’yî zî bi kongreya xo ya 12. de cidîyetê xo eşkera kerdibi. Yanî hetê kurdan cidî yo. Nika ganî Komîsyon pêro terefan daxîlê prosesî bikero.
Sermuzakerewanê kurdan Rayber Apo yo. Coka ganî Komîsyon Rayber Apoyî goşdarî bikero. Xora Rayber Apoyî zî no waştibi. Ganî Rayber Apo zî heyetê ci zî bêrê berdene bi Meclîsî û bêrê goşdarîkerdene. Yew menge ra nata çew nêeşkeno Rayber Apoyî bivîno. Wina nêbeno. Heta ke Rayber Apo Îmrali de sey rehîne bitepişîyo komîsyon do nêeşko aver şoro.
Hetê bînî ra îqtîdarê dewleta tirke hema zî polîtîkayanê dişmenîya vera kurdan ano ca. Sûrîye de dewleta tirke seba ke kurdî tewrê îdareyî mebê destê ci ra çi yeno kena. Ma zanenê ke waştişê Tirkîya ser o hukmatê El Şarayî tewrê kombîyayîşê Parisî nêbi. Eke dewleta tirke raşta zî haştîye û demokrasîyî wazena ganî goreyê ci têbigêra.
Ganî xebatê Komîsyonê Meclîsî bi hawayêkê zelalî û netî bêrê kerdene. Ganî her hetê Tirkîya paştî bido nê xebatan. Kes û sazîyê ke dormeyê AKP’yî de rê vanê ke Rojawan de şer do bêro kerdene. Xora Vakurê Kurdîstanî de zî şero taybet dewam keno. Ganî no feraset bêro vurnayene.
Komel çîyanê zelalan paweno, bi qiseyan hinî bawer nêkeno. Eke AKP raşta zî wazeno meseleya kurdan çareser bikero o çax ganî goreyê ci têbigêro û ziwanê şerî ra zî fek vera bido.
Ez embazanê ma yê şehîdan Nureddîn Sofî, Koçero Urfa û Bahtîyar Gabarî bi rêz û minetî yad kena. Gerîlayî tim wayîrê şehîdanê xo vejîyayî û qesas girewt.
Embaz Sofî û Koçero Urfa kesê serkêşî bîyî. Înan tim tecrubeyê xo pare kerdî û xoverdayîş aver berd.
Embaz Koçero tim kesêko pozîtîf, kedkar, şay û biîrade bi. Ey têkoşîn tim hol fam kerd û ard ca. Embaz Nuredîn Sofî zî kesêko entelektuel, serkêş û şorişgêr bi. Ez nînan ancî bi rêzî yad kena. Ma soz danê ke ma do armancanê şehîdanê xo bîyarê ca û vîrameyîşanê înan bipawê.”
