Raporê hîrê aşman ê kampanyaya ‘Vatişê ma nêqedîya, ma do şîdetî pîya vindarnê’ rayapêroyî reyde ame parekerdiş. Derheqê raporî de Koordînatora Mudirîya Polîtîkayanê Cinîyan ya Şaredarîya Peyasî, Gunay Yakut da zanayîş ke bi na kampanya xo resnayo xeylê cinîyan.
Heyetê Cinîyan ê Îdarekarîya Herêmî ya DEM Partî bi wesîleya 25ê Teşrîna Peyêne Roja Têkoşînê Hemverê Şîdetê Cinîyan 13ê teşrîna peyêne de kampanyaya ‘Vatişê ma nêqedîya, ma do şîdetî pîya vindarnê’ ke do serrêk dewam bikero, da destpêkerdiş. Hetê şaredarîyê şaristanê girdî û şaredarîyê qezayan ra raporê hîrê aşman ê kampanya rayapêroyî reyde ame parekerdiş. Eşkerayîya parekerdişê raporî de eynî wextî de startê programê 8ê Adare Roja Cinîyan ê Dinya zî ame dayîş.
Koordînatora Mudirîya Polîtîkayanê Cinîyan ya Şaredarîya Peyasî, Gunay Yakut raporê hîrê aşman ê kampanya ajansê JINNEWS’î erjna.
Bi na kampanya seba problemanê cinîyan polîtîkayî yenê averberdiş
Gunay Yakut da zanayîş ke semedê wareyê ke rêxistin û paştîdayîşê cinîyan xurt beno, awan bikerê û hemverê şîdetî kewtê rayîr û wina vat: “Îdarekarîya herêmî de wareyê ke cinî muracat bikerê nêmendibî. Na kampanya tena Amed de nê, herêma Serhed, Botan û pêro Tirkîya de yena kerdiş. Çi heyf ke tayînkerdişê qeyûman hema zî dewam keno û ma zî xebatanê xo bêmabên domnenê. Ma her roje kampanya pîle kenê û xebatanê xo domnenê. Na kampanya semedê averberdişê mekanîzmayê têkoşînî yê hemverê şîdet û semedê averşîyayîşê polîtîkayanê hemverê şîdetî, semedê têduştîya cinsî ya komelî ke xebatî bêrê kerdiş, ameye destpêkerdiş. Ma nê hîrê aşman de dew, taxe, AVM, bazar û xeylê wareyan de xebatî kerdî. Ma xeylê wareyan de xebatê atolyeye kerdî.”
Atolyeyê tewir bi tewir ameyî kerdiş
Gunay Yakut wina dewam kerd: “Ma atolyeyan de têduştîya komelî, şîdetê cinîyan, tewirê şîdetî, têkoşînê hemverê nînan û caardişê qanûnê 6284î ser o xebatî kerdî. Eynî wextî de ma atolyeya cuyêka bêşîdet pê arde. Ma atolyeyê pawitişê cewherî pê ardî. Ancî roja ewro de şîdetê dîjîtal zêde beno. Ma derheqê nê de kampanya daye destpêkerdiş. Ma xo resna 15 hezar cinî. 3 aşman de hema hema pêro qezayan de merkezê paştîdayîşî kewtî cuye. Xeylê merkezî ameybî padayîş, newe ra ameyî akerdiş û muracatê cinîyan ameyî girewtiş.”
Cinî bi ruhê 8ê Adare meydanan de yê
Gunay Yakut dîyar kerd ke do bi ruhê 8ê Adare dewan û taxan de xebatan bikerê û cinîyan reyde bêrê têhet û wina vat: “Eynî wextî de awankerdişê pawitişê cewherî lingêke kampanyaya ma ya. Ma eynî wextî de bingeyê medyaya dîjîtale awan kenê. Semedo ke ma zanê xeylê kesî medyaya dîjîtale şuxilnenê û bi taybetî cinîyê ciwanî zaf şuxilnenê. Ma do bi nê metodî xo biresnê cinîyan û pîya 8ê Adare de meydanan de bibê.”
