Endamê Konseya Rayberdişî ya KCK’yî Mustafa Karasuyî ard ziwan vengdayîşê Rayber Apoyî yê 27ê sibata 2025î ra dima Tirkîya de vurîyayîşê muhîmî qewimîyayî û dîyar kerd ke na merhela de êdî ê wazenê pê rayîrê sîyasetê demokratîkî têkoşîn bikerê.
Serekîya Têgêrayîşê Apoyîyan, Waranê Pawitişê Medya de bi boneyê serrgera yewine ya kongreya feshkerdışê PKKyî û qonaxa peyêne ya ‘Prosesê Haştîye û Komelê Demokratîkî’, kombîyayîşê çapemenî viraşt. Endamê Konseya Rayberdişî yê KCK’yî Mustafa Karasu ke metnê eşkerayîya bi tirkî wend, derheqê serra peyêne ya qerarê feshî ra dima erjnayîşê xo kerdî.
Karasuyî vat ke şertê têkoşînî vurîyayî, paradîgma vurîya û Têgêrayîş resa fehmê sosyalîstê neweyî, sosyalîstê demokratîk. Karasuyî vat: “50 serran ra dima feshê yew partî fehmbar o. PKK’yî mîyanê 50 serran de destkewteyê girdî girewtî la mîyanê 50 serran de vurîyayîşê girsî qewmîyayî. Coka feshê PKK’yî qedîyayîşê yew têkoşînî nîyo, destpêkêko newe yo. 50 serran ra ver fikrê dewleta neteweyî est bî, ma no ca verda. Êdî bi sîyasetê demokratîkî û têkoşîno demokratîk wazenê amancê xo bîyarê ca.”
PKKyî nirxê zaf girdî afırnayî
Karasuyî ard ziwan ke PKK’yî mîyanê 50 serran de nirxê zaf girdî afirnayî û vat: “Ganî feshê PKK’yî sey destpêkêko newe bêro erjnayene. Tede tesîrê paradîgmaya newîye zî est o. Rayberîye 2004î de paradîgmaya azadîya cinîyan, ekolojîk û komelê demokratîk arde rojeve. Ê demî de zî Kongra Gel amê ronayene û PKK amê feshkerdene. Coka feshê PKK’yî newe nêame rojeve. Êdî ma wazenê pê rayîrê sîyasetê demokratîkî têkoşîn bikerê. Eke dewlete na mesela de eşkera bo, ma fikrîyenê ke amanc û waştişê xo do bi rayîrê sîyasetê demokratîkî bêrê caardene.”
Vengdayîş ra dima Tirkîya de vurîyayîşêko muhîm bî
Karasu ard ziwan ke vengdayîşê Rayber Apoyî yê 27ê sibate 2025î ra dima Tirkîya de vurîyayîşêko muhîm bî û vat: “Verê AKP’yî muxalefet bi parçekarîye û terorîzmî îtham kerdêne. Argûmano ke îqtîdarê AKP’yî vera muxalefetî û hêzanê demokrasî şuxulnayêne, mîyan ra wedarîya. 2007î ra heta 2015î de ma adirbest îlan kerd. Serrê tewr demokratîkî yê Tirkîya ê demî bîyî. Edebîyat, huner û fikr de bi azadî îfade est bî û Vakayê Gezî zî ê demê nermbîyayîşî de vejîyayî meydan. Coka feshê PKK’yî bî wesîle ke îqtîdar nêeşko bi behaneyê PKK’yî hêzanê demokrasî ser şêro. Na rewşe hetê hêzanê demokrasî ra warêko eyînî afirna.”
Hêzê demokrasî no proses baş nêxebitna
Karasuyî peynî de dîyar kerd ke hêzê demokrasî no proses qaso ke hewce bî, nêxebitna û vat: “Tede kêmanî est ê. No proses eynî wext de proseso ke hêzê demokrasî zî eşkenê azadîya rêxistinkerdişî û îfadeyî aver berê. Derûdorê ke nezdîyê Têgêrayîşê Azadîye yê Kurdan dîyenê, hema yenê hedefgirewtene la nê goreyê verê kêmî bîyî. Eke prosesê Haştîye û Komelê Demokratîk hetê heme hêzanê demokrasî, şarê ma û şarê Tirkîya ra bêro paştîdayene, do mîyanê demî de hêrişê îqtîdarî zî vera hêzanê demokrasî kêmî bibê û warê demokratîkbîyayîş û azadbîyayîşî hîna zêde bibo.”
