Platformê Ma Do Kiştişê Cîniyan Vindarnê (KCDP) raporê aşma nîsane eşkera kerd. Goreyê raporî aşma nîsane de 26 cinî ameyê kiştene.
Platformê Ma Do Kiştişê Cinîyan Vindarnê (KCDP) ke 16 serrî yo derheqê kiştişê cinîyan de melumatan pare keno, daneyê aşma nîsane vila kerdî. KCDP melumatê aşma nîsane yê derheqê kiştişê cinîyan de bi hawayêko nuştekî pare kerdî. Goreyê raporê KCDP’yî aşma nîsane de 26 cinî ameyê kiştene. 23 cinî zî bi hawayêko gumanbar cuya xo ra bîyê.
Kiştişê 26 cinîyan de; 4 cinî semedê aborî, cinîyêk seba ke waştişê pêameyîşî qebul nêkerdo, cinîyêk zî seba ke domanê xo bîyara dinya ameya kiştene. Goreyê raporî mergê 20 cinîyan bi kamcîn sebebî qewimîyayo, nêameyo zelalkerdene.
KCDP’yî dîyar kerd ke bi polîtîkayanê îqtîdarî cinî nêyenê pawitene, seba nê zî sebebê mergê 20 cinîyan nêameyo zelalkerdene. KCDP’yî da zanayene ke eke cezayê giranî nêdîyê faîlan û tedbîrî nêrê girewtene, nêheqî û şîdet hîna zêde benê.
Goreyê raporê KCDP’yî; 10 cinî hetê mêrdeyanê xo ra, 2 cinî hetê ‘heskerdoxanê’ xo yê verênan ra, cinîyêk hetê pîyê xo ra, cinîyêk hetê merdimanê xo ra, cinîyêk- hetê lajê xo ra, cinîyêk zî hetê nasê xo ra ameye kiştene. Kiştişê 6 şeş cinîyan de zî nasnameyê kiştoxan nêameyo eşkera kerdene.
