Hemserekîya Konseya Rayraberdişî ya KCK’yî, Qazî Mihemed, Mahir Çayan û şehîdê şorişî û demokrasîye yê ke hewteyo peyên ê adare de yenê yadkerdene, bi rêz û sipasî yad kerdî û sozê dewamkerdişê têkoşînî da.
Hemserekîya Konseya Rayraberdişî ya KCK’yî bi wesîleyê 30 û 31ê Adare eşkerayîya nuştekîye daye û Qazî Mihemedî û embazê ey ê ke Mehabadî de Meydanê Çarçirayî de ameyî dardekerdene, Mahir Çayan û embazê ey ê ke Kizildere de ameyî qirkerdene û heme şehîdê şorişî û demokrasîye yê ke hewteyo peyên ê Adare de yenê yadkerdene, yad kerdî.
KCK’yî eşkerayîye de dîyar kerd ke nê tarîxî seba şarê kurdî û têkoşînê şorişgerî cayêko muhîm gênê. Şexsê Mazlûm Dogan û Agit-Mahsum Korkmaz de ke sembolê Hewteyê Qehremanîye yê, heme şehîdî bi rêz û sipasî yad kerdî.
KCK’yî eşkerayîye de vat ke Qazî Mihemed û embazanê ey seba rûmet û azadîya şarê kurdî ke înkarkerdişê estbîyayîşî û jenosîdî dîyo, bê tereddut têkoşîn kerdo û ganê xo feda kerdo. Seba hişmendîya neteweyî û yewîya kurdî gamê muhîmî eştî. Îdareyo ke awan kerd, emirkirr bî la hişmendîya şarê kurdî de cayêko gird girewt û mîrasêko gird verda.
KCK’yî dîyar kerd ke têkoşîn û xeta ke Mahir Çayanî pêşengîya ci kerda, hem averşîyayîşê hereketê sosyalîstî yê Tirkîya de hem zî averşîyayîşê Têgêrayîşê KCK’yî de rolêko muhîm girewtbî. Vat ke Rayber Apoyî na raştîye hertim îfade kerd û cehdê xo sey wayîrvejîyayîşê mîrasê Mahiran pênase kerd. Prosesê Haştîye û Komelê Demokratîkî zî esasê xo de wazeno ke têkoşîno ke Mahir Çayanî dest pêkerd, hîna bêro averberdene û domdar bibo.
KCKyî peynî de vat ke hewteyo peyên ê Adare de bi desan embazê erjîyayî şehîd bîyî û nê şehîdî hertim do roşnîye bidê têkoşînê azadîye û têkoşîn bi pêşengîya înan do bieşko bireso serkewtişî.
