Hukmatê demkî yê Sûrîye heme kedkaranê cigêrayîşanê zanistîyan heqanê înan ra mehrum kerd û hema qedexeyê vejîyayîşê teberê Sûrîye seba înan vîyartbar o.
Kedkaranê cigêrayîşanê zanistîyan ra yew û mamosteyê unîversîte ke nêwaşt nasnameyê ey bêro eşkerakerdene, ajansa ANHA rê qisey kerd.
Mamosteyê unîversîte vat: “Ma cigêrayîşanê zanistîyan de kadroyanê perwerdeyî yê tewr baş ê. Heme kedkarê ke cigêrayîşanê zanistîyan de xebetînê unîversîteyanê tewr rindan de wend û bawername girewt. Ma goreyê perspektîfanê dewlete xebetîyênê û badê ke rejîm rijîya û cigêrayîşê zanistî ameyî wêrankerdene, ma xebate ra ameyî dûrîkerdene û qedexe bî ke ma bivejîyê teberê Sûrîye. No qedexe heme kesan rê û heta sûcdaran rê ame wedarnayene la no qerar seba ma vîyartbar o.”
Mamosteyê unîversîte sewbîna ard ziwan ke no bîyayîş zêdeyê serrêk o rijîyayîşî rejîmî ser o vîyarto û hîna rewşa înan zelal nîya û vat: “Qey beno ke hemwelatîyanê Sûrîye ser o ferz bikerê ke bivejîyê teberê Sûrîye? Ma karê xo ra ameyî dûrîkerdiş, heqê ma nêdanê ma û qedexe kerd ke ma bivejîyê teberê Sûrîye. Xora destur nêdanê ke ma unîversîteyan de yan zî cayêko bîn de bixebitîyê, qey sûcê ma çi yo ke ma kedkarê sîvîl ê?”
Kedkarêka cigêrayîşanê zanistîyan zî ke aye zî nêwaşt nasnameyê aye bêro naskerdene, qisey kerd û wina vat: “Tayê kesî est ê ke hukmatî de yê, nêwendo û bawernameyê înan çin ê la ma ser o wina kerd. Nêzanê ke cigêrayîşê zanistî muhîm ê û kewenê binê xizmetê averberişê heme hetanê cuye sey weşîye, sînayî û xizmetguzarîye.”
Mamostaye unîversîte dewamê qiseykerdişê xo de vat ke eke na rewşe wina dewam bikero û heme kedkarê cigêrayîşanê zanistîyan heqanê xo ra bêrê mehrumkerdene, ê do verê xo bidê dewletanê teberî û xizmetê dewletanê bînan bikerê.
Mamoste dewama qiseyanê xo de persa: “Çira heme kadroyê cigêrayîşanê zanistîyan ameyî cezakerdene û ê heqê xo ra mehrum bîyî û qedexe bîyo ke bivejîyê teberê Sûrîye?”
