KESK, derheqê îmhakerdişê çekan de eşkerayî da û va ke ê do aştîye rê paştî bidê û gamê ke ganî bêrê eştiş rêz kerdî, sifte ziwanê dayîke astana makeqanûnî de bêro qebulkerdiş.
Konfederasyonê Sendîkayanê Kedkaranê Raya Pêroyî (KESK), derheqê merasîmê îmhakerdişê çekanê Koma Aştî û Komelê Demokratîkî de eşkerayîya nuştekî da. Eşkerayîye de ame vatiş ke perwerdeyê bi ziwanê dayîke, waştişê xizmetê raya pêroyî û demokratîkbîyayîş parçeyê prosesi yê.
Eşkerayîye de ame vatene: “Ma do seba ke têkoşînê aştî û komelê demokratîkî aver şîro, berpirsîyarîya sendîkagerî bîyaro ca; bi hêzê kedî û demokrasî reyde do pîya hereket bikerê û prosesî de aktîf bibê. Ma, sey yew rêxistina kedkaran ke bi raştîya ke aştîya mende bi tewrbîyayîşê şaran û yew xeta têkoşînî mumkîn a, hereket kenê, avzelî danê ke proses, parlamentoyî de nîro tengkerdiş, bi yew xebata demokratîke ya ke rêxistina komelkî ya demokratîke û kedî zî eşkenê qisey bikerê; bi komelî reyde şefaf bêro parekerdiş.”
Gamê ke prosesî rê ganî bêrê eştiş wina rêz bîyî:
-Heme kedkaranê raya pêroyî yê KHK’yî, bi heqê tazmînat û tepa agêrayîşî reyde, wezîfeyanê xo ser biagêrê.
-Pêameyîşê Stenbolî newe ra ca bibo.
-Heqê perwerdeyî û xizmetê raya pêroyî, bi ziwanê dayîke ser asta makeqanûnî de bêro qebulkerdiş.
-Rejîmanê qeyuman rê peynî bêro dayîş û rayberîyanê xocayî îradeya şarî ra bêrê veradayîş.
-Huqûqê îstîsnayî yê ke dewreya pêkewtişî de serdest bi, wedaro û huqûqê dewlete newe ra bêro ronayîş.
