Wendişê kitabanê Rayberê Şarê Kurdî Abdullah Ocalanî dewam keno. Meclîsê Şarê Kurdî yê Londonî bi munasebetê rojbîyayîşo 76. yê Rayberê Şarê Kurdî Abdullah Ocalanî awanîya KCC’yî yê Londonî bi sernameyê ‘Wendişê Abdullah Ocalanî’ çalakîya wendişê kitaban organize kerd.
Çalakî de standê kitabê derheqê felsefeya Modernîteya Demokratîke ya Rayberê Şarê Kurdî Abdullah Ocalanî ser o ameyê ronayene û sernameyê ‘Neteweya Demokratîke’, ‘Rayîşro hîrêyin’, û ‘Modernîteya Demokratîke’ ameyê nîqaşkerdene. Xeylê ciwanê enternasyonalîstî beşdarê çalaki bîyê. Nuştox Îlham Bakir beşdarê çalaki bi. Îlham Bakir îfade kerd ke mîyanê şertanê Şerê Dinyayî yê Hirêyin de wendişê Rayberê Şarê Kurdî Abdullah Ocalanî muhîm o û vat: “Demo ke merdim bala xo dane şer, qirkerdiş û kiştan ser o ke Rojhelato Mîyanên de qewimîyenê, seba xelisîyayîşê cehenemê Rojhelato Mîyanênî ra; paradigma, nêzdîbîyayîş û peşnîyarê Rayber Apo’yî yê seba awankerdişê cuyêka zafrengî ya demokratîke xeylê muhîm ê.”
Îlham Bakir dîyar kerd ke kurdî roşnkerdişê Rojhelato Mîyanên û ronesansê Rojhelato Mîyanên de temsîlkarî kene û îfade kerd ke pêşeng û hêzo fikrî yê nê ronesansî zî Rayberê Şarê Kurdî Abdullah Ocalan o. Îlham Bakir dîyar kerd ke wendişê Rayberê Şarê Kurdî Abdullah Ocalanî, fehmkerdişê peşnîyaranê ey û bicaardişê înan muhîm o û vat: “Seba şarê kurdî û şaranê Rojhelato Mîyanên fehmkerdişê Rayber Apoyî muhîm o. O semedî ra ganî na çalakîya wendişê ey bêra xurtkerdene, fikre Rayber Apoyî bêrê nîqaşkerdene, fîlozofê ke ey ci ra îstîfade kerdo bêrê wendene û nîqaşkerdene. Ganî na paradigma raşt bêra fehmkerdene û wina bêra bicaardene.”
