Nuştox Nesrîn Akgul bi hîrê nasnameyê xo yê cinî, elewîye û kurd, her tim xover da. Nika waşt bi kitabê “Tarîxê bawerîyan de elewîyîye” bawerîya elewîyîye weş bida şinasnayene. Kitab bi 4 beşê ameyo hadrekerdêne.
Nuştox Nesrîn Akgul peynîya cigêrayişê bi serran kitabê “Tarîxê bawerîyan de elewîyîye” nuşt. Kitab hetê Weşanxaneyê Jingehî ra vejîya. Nuştox no kitab hepisxane de binê teda û zilmî de netîceyê cigêrayişêko hîşê xo ser daya reyde hadre kerd. Nuştox kitabê xo de bawerîya elewîyîye heme hetan ra gêna dest. Vateyo vêren o kitabî zî hetê Haydar Akgul ameyo nuştene.
Ez verê ra est bîya
Haydar Akgul vateyo vêren o kitab de wina vano: “Kitabo ke destê şima de yo, zafêrî hepisxane de ameyo nuştêne. Nesrîn Akgul destpê nuştişê kitabî sifte hepisxane de destpê kerd û peynî zî demêko teber de domna la hewna kewt hepisxane û no ray kitabê xo hadre kerd û resna destê şima.”
Akgul wina domnena: “Nesrîn Akgul bi no kitab wazena elewîyîye weş bida şinasnayene. Elewîyan çi heyfo ke demê Împaratorîya Osmanîyan de ameyê qirkerdiş, hewna demê Komare de zî Dêrsim, Mereş, Çorum, Madimak û Gazî de ameyê qirkerdêne. Vatişo elewîyîyêk est o: ‘Hîna asmên û erd çinîbî, ez verê ra est bîya.’ Nesrîn hem elewî ya hem zî kurd a. Dewlet hem waşt elewîyîye hem zî kurdewarîye asîmîle bika. Nesrîn Akgul zî rayîro azadîye ra bi nasnameyê xo yê cinî, elewîye û kurd kewena. Ez Nesrîn Akgul pîroz kena.”
Kitab de 4 beşê est ê
Kitab bi 4 beşê ameyo hadrekerdêne. Beşo yewin o kitab de behsa tarîxo komelî û formê bawerîyan yena kerdêne, beşo diyine de sembolê bawerî yê protoyê kurdan, beşo hîrêyine de zî qezenckerdişê nasnameyî yê bawerîya elewîye, beşo çarin de zî tarîxê elewîyan de demêk: averşîyayişê demî yê Safevî û Osmanîyan.
