KNK’yî roşanê paskalya yê Mesîhîyan pîroz kerd û vat: Wa Roşanê Paskalya hêzêko gird û îradeyêko bihêztir bido yewîye, cuyêka aştîye û bextewerîye.”
Konseya Rayberîya Neteweyî ya Kurdîstanî (KNK) bi munasebetê Roşanê Paskalyaya bawermendanê Mesîhî mesajêk pîrozkerdişî pare kerd. KNK’yî bale ante serê prosesê ke ameyo verê qonaxêke tarîxî û wina vat: “Ewro roşan o, roja qîyame yo, roja newebîyayîşî yo, Roşanê Paskalya yo. Wexto ke şarê Mezopotamya û şarê Kurdîstanî qonaxêke tarîxî ra derbas benê, ma roşanê şaranê Asurî-Suryanî-Keldanî, Ermenî û heme bawermendê ke Mesîhîyê bi zerrîyêka weşe pêşwazî û pîroz kenê.”
‘Qonaxê dîyarkerdişê qedere’
KNK’yî dîyar kerd ke proseso nikayin zaf muhîm o qonaxê dîyarkerdişê qedera şaran ê herême yo û wina dewam kerd: “Şerêko gird mabênê Amerîka-Îsraîl û Îranî vejîyayo. No şer zafêrê herêma rojavayê Asya de vila bîyo. Her çend ma hetê nê şerî nêbê zî la zafêrê welatê ma zî bîyo warê şerî. Ma na rewşe de Roşanê Paskalya pêşwazî kenê. Nê rojanê tarîxî de ma hêvî kenê ke pîrozkerdişê Roşanê Paskalya hêzêko gird û îradeyêko hêzdar bido yewîye û ronayîşê komelê têduştîye, aştî û bextewerîye.”
‘Bibo wesîleyê aştî û aramîye’
Peynîyê eşkerayîya xo de KNK’yî waşt ke Roşanê Paskalya bibo wesîleyê aştî û aramîye û wina vat: “Ma sey KNK’yî zerrî ra Roşanê Paskalya ro pêroyî bawermendanê Mesîhî û heme şaranê Kurdîstanî û pêroyî dinya pîroz kenê. Ma hêvî kenê ke no roşan temam ê dinya û welatê ma de bibo wesîleyê aştî û aramîye.”
Derheqê Roşanê Paskalya de
Paskalya, yew roşananê tewr muhîm a Mesîhîyan a û xeylê welatan de pêroyî dinya de bi çoşe yena pîrozkerdene. No roşan newerabîyayîşê Îsa Mesîhî yo, goreyê bawerîya Mesîhîyan ra hîrê rojî dimayê çarmixkerdene, Îsa Mesîh newe ra ganîbîyo.
Paskalya her serre demêko cîya de yena pîrozkerdene. Goreyê qerarê konsîlî Îznîkî ra serra 325 de girewto, bi hesabanê astronomî ekînoksê 21ê Adare ra pey aşma pirre vejîyena aye ra dima roja yewşeme yo verên roşanê paskalya yo.
Çarçewaya rîtûl ê adetî de xeylê welatan de rengkerdişê hakan û vilakerdişê înan seba gedeyan dewam keno. Hakî sey sembolê cuya newe yenê qebûl kerdene. Hargûş zî sey sembolê bereketî û berdarî kulturê rojawanî de cayê xo girewto.
Mîyanê komelî de paskalya sey roşanêko tede mesajê hêvî, bereket, newebîyena manewî, parekerdiş û destpêko newe yeno vînayene.
