Hemsereka KNK’yî Zeyneb Murad dîyar kerd ke Herêma Kurdistanê Federalî de di hewte yo seba yewîya neteweyî xebate kenê û vat: “Ma rê stratejîyêka neteweyî û dîyalogî lazim a. Seba ney zî konferansêka neteweyî acîl û hayatî ya.”
Tirkîya û SMOyo ke kontrolê aye de yo hêrîşê xo yê Rayberîya Xoserî ya Vakur û Rojhelatê Sûrîye dewam kenê. Verba hêrîşan vengê yewîya kurdan zî dewam keno. Heyetê Kongreya Neteweyî yê Kurdistanî (KNK) dest bi xebatanê yewîya neteweyî kerd. KNK di hewte yo Herêma Kurdistanê Federalî de xebatanê xo yê yewîya neteweyî dewam keno. Çarçewaya xebatan de ke 31ê kanûne de dest pêkerdî, heyetê KNK’yî partîyê sîyasîyan û dezgehanê medya reyde pêvînayîşî kerdî û fikr û pêşnîyazê înan girewtî.
‘Pêvînayîşan vurîyayîş viraşt’
Zeyneb Murad va ke destpêkê hêrîşê verba Vakur û Rojhelatê Sûrîye ra dima, înan seba Yewîya Neteweyî ya Kurdan xebatêk daya vernîya xo û wina dewam kerd: “Ma bi munasebetê seserrîya Lozanî, Lozan de konferansêko gird organîze kerd. Ma nê konferansî de babetê yewîye û neteweyî ser o vindertî. Nêzdî de konferansêko neteweyî do bêro organîzekerdene. Seba ke konferans ameye kerdene û encam bigîro, ma do fikrê her çar parçeyê Kurdîstanî bigîrê û aver şêrê.”
‘Stratejîyêka neteweyî ma rê lazim a’
Zeyneb Murad ke bale ant muhîmîya Konferansê Neteweyî yê Kurdan ser, dîyar kerd ke ganî rayîrê dîyalogî mabênê hetanê kurdan de akerde bibo. Murad va: “Heme hetê sîyasî ser o berpirsîyarîyêka girde est a. Dîndarî, cinî, ciwanî û heme çevreyî ganî berpirsîyarîyêka girde bigîrê. Ganî ma na prosese ra bi serkewtiş vejîyê. Stratejîyêka neteweyî ma rê lazim a. Seba ney zî konferansêka neteweyî acîl û hayatî ya.”
Murad qiseykerdişê xo wina qedêna: “Ma do çar leteyê Kurdistanî ra nê xebatan bidomnê. No vengdayîşêko neteweyî yo. Tena dormeyê sîyasî nê, her kes ganî na wezîfe û berpirsîyarîye bigîro xo ser. Ganî akemîsyen, roşinvîr, hunermend, dîndarî, ciwanî û cinî bêrê têhet û ma qerarêk bigêrê.”
