Cinîyê Efrînî ke 8 serrî yo cayê xo ra koçber bîyê, tena agêrayîşêko ewle qebul kenê û mîyanê kampê penaberîye de û mîyanê şertanê zehmetan de hunerê xo ganî tepîşenê.
Mîyanê çadirê penaberan ra vengê defe û bilûre berz beno, lorikê ke bi hîvî pûr ê û telanê sazî de melodîyê agêrayîşî yenê cenitene. Ê cinîyê koçberê Efrînî yê, binê şert û mercanê zehmetan de bi kincanê xo yê folklorîkan reqesîyenê û mîyanê hîvîya agêrayîşêkê ewleyî de, mîraso edetî ganî tepîşenê.
Goreyê xebera JINHA’yî Kantonê Efrînî yê Vakûr û Rojhelatê Sûrîye, teberê nasîyayîşê xo yê bi daranê zeytûnan û tebîetê xo yo bêhempa, bi dewlemendîya xo ya kulturî û hunerî zî namdar o. Şarê ci wayîrê yê vengêko zêrîn o û hunerê defcenitîşî û bilûrfukerdişî de zî westa yo.
‘Ma do biqerar kulturê xo bipawê’
Leyla Reşîd, 7 serrî yo endama Hereketê Hîlala Zêrîne ya û Koma Folklorî ya Şehîd Mizgîne de ke Şehba de ya, deyîran vana. Leyla Reşîd, îzeh kerd ke kultur nasname û tarîxê şarêk o û wina vana: “Her çiqas ma cayê xo ra bîyî zî ma destûr nêda ke zehmetîyî vernîya xebatanê ma yê semedê ganîtepîştişê edetanê ma bigêrê.”
Şarê Efrînî yo ke badê koçberîya xo ya yewine ya serra 2018î, koçê Şehba û dima ra zî koçê Tebqa û herêmanê bînan ê Vakûr û Rojhelatê Sûrîye kerd, hunerê xo dewam kerd. Di komê neweyî awan kerdî. Yew; Koma Govende ya Zarya Zêrîn û Koma Muzîkî ya Xwebûn. Leyla Reşîd, wina vana: “Her çiqas ma di ray koçber bîyî û maruzê îşxalî mendî zî, ma biqerar ê ke kulturê xo bipawê.”
Leyla Reşîd, dewamê qiseykerdişê xo de wina va: “Her çiqas ma wextêko kilm Tebqa de mendî zî ma zaf konser û festîvalan de ca girewt. Çîyo ke koma ma yê bînan ra cîya keno, o yo ke pêro endamê ma cinî yê. Cinîyî tebîîyane, zêdeyêr girêdayeyê kultur, tebîet û axa xo yê.”
Binê çadirê koçberîye de kulturê xo pawenê
Bi defe û bilûre reyde, vejîyenê seredîke û mîyanê tilîlî û çepikan de bi deyîranê şarî û reqsanê folklorîkan hunerê xo pêşkêş kenê. Kincê înan mîyanê ahengîye de yê û sey yew tabloyêka hunerî asenê. Labelê, yew raştîyêke esta ke her kes nêvîneno; na kome, reqs û muzîkê xo çadiran de binê hewayê germ û serdî de virazena.
Leyla Reşîd, bi nê qiseyan qiseykerdişê xo qedîna: “Zehmetîyan qetî astengî nêvete. Ma bi îmkanan û şertanê ewroyînan de hunerê xo ganî tepîşenê, çunke fikrê hêzdarî ke mîyanê ma de ganî yê, ma mecburê averşîyayîşî kenê. Goneyî, çem, ko û kulturê Efrînî, mîyanê ma de sey yew vîrardişo ganî manenê û mîyanê nê şertan de semedê xoverdayîşê ma benê çimeyê hêzî.”
