Serekê Weqfa Aştîye Hakan Tahmazî pare kerd ke Komîsyono ke Meclîs de ronîyayo, seba çareserîya bêçeke, bêpêkewtişe û huqûqîye firsendêkê tarîxîyî pêşkêş keno.
Serekê Weqfa Aştîye Hakan Tahmazî derheqê Prosesê Haştîye û Komelê Demokratîkî û Komîsyonê Meclîsî de ajansê ANF’î rê qisey kerd.
Tahmazî da zanayene ke hema zî mîsyon û vîzyonê serê Komîsyonî nedîyar ê û va: ‘’Nêzanîyeno ke AKP do ser bikero. Vengdayîşê Birêz Ocalanî zî bira çekveradayîşî ya PKK’yî gamê pozîtîf ê. Komîsyono ke Meclîs de ronîyayo, seba çareserîya bêçeke, bêpêkewtişe û huqûqîye firsendêkê tarîxîyî pêşkêş keno. Seba ke aştîye meşrû biba sîwana Meclîsî girîng a.
Mojnayîşê îrade muhîm o. Mesele tena çekveradayîş nîya. Ganî zemînê dîyalogan bêro ronayene. Çekî bêveng bibê zî beno ke şîdeto kulturel û sosyal dewam bikero. Coka çareserîya sîyasîye lazim a. Sey weqfe vengdayîşê Ocalanî ra dima ma amadekarîye kenê ke mesele biancê zemînê sîyasîyî û aştîye komelkî bikerê.
AKP wina bîyo ke destkewteyanê kurdan rê tehamul nêkeno. AKP Rojawanî sey gefî vîneno. Hetê bînî ra operasyonê vera CHP’yî dewam kenê. Nê kerdişî tansîyonî zêdînenê û xîretê haştîye yê Ocalanî asteng kenê. AKP bêzerrî aseno. No zî rîskî virazeno. Beno ke alozîyê mabênê AKP û MHP’yî û tansîyono nikayên prosesî teng bikero.’’
