Komîsyonê Demokrasî, Wa û Birayî û Piştîdayîşê Mîllî do kombîyayîşê xo yê nê hewteyî de goş bido sendîka, oda, rêxistinanê komelê sîvîl û karsazan.
Komîsyonê Demokrasî, Wa û Birayî û Piştîdayîşê Mîllî ke çarçewaya çareserîya demokratîk ê meseleyê kurdî de meclîs de ame awankerdene, do 11 û 12ê êlule de kombîyayîşê xo yê 8 û 9. organîze bikero. Komîsyonî heta nika hewt kombîyayîşî kerdî. Kombîyayîşê yewin de rêgezê xebata xo dîyar kerdî û kombîyayîşanê bînan de zî, temsîlkarê beşanê cîya yê komelî goşdarî kerdî. Nînan ra vêşêr komîsyonî xebatêka bîne nêkerda. Hema pêşnîyazî ke hetê kesanê ke ameyê goşdarîkerdene, ameyê kerdene, ê zî nêdekerdê rojevê xo.
Do rêxistinê kede bêrê goşdarîkerdene
No hewte komîsyon do bi konfedarasyonê ke oda, komele, sendîka û rêxistinê ke komelê sîvîlî xo de hewînenê û karsazan reyde bêro têhet. Na çarçewa de komîsyon do kombîyayîşê xo yê 8. û 9. de temsîlkaranê Konfederasyonê Sendîkayanê Karkeranê Raya Pêroyî (KESK), Konfederasyonê Sendîkayanê Karkeranê Şorişgir ê Tirkîya (DÎSK), Konfederasyonê Sendîkayanê Karkeranê Tirkîya (TURK-ÎŞ), Konfederasyonê Sendîkayanê Heqan (HAK-ÎŞ), Konfederasyonê Sendîkayanê Karkeran (MEMUR-SEN), Konfederasyonê Sendîkayanê Karkeranê Raya Pêroyî yê Tirkîya (TURKÎye-KAMÛ-SEN) û Konfederasyonê Yewbîyaye yê Sendîkayanê Karkeranê Raya Pêroyî (BÎRLEŞÎK KAMU-ÎŞ) reyde kom bibo.
Komîsyon kombîyayîşê xo yê 9. ê 12ê êlule de do Yewîya Oda û Borsayanê Tirkîya (TOBB), Yewîya Odayanê Ramitişî yê Tirkîya (TZOB), Konfederasyonê Esnaf û Zanatkaranê Tirkîya (TUSÎAD) û Komela Meslekî û Karsazanê Mustaqîl (MUSÎAD) reyde bêro têhet.
