KON-MED’î hêriş û tewirê vera futbolbaz Denîz Undavî yê maçê Fenerbahçe-Stuttgartî şermezar kerdî û veng da UEFA ke wa wezîfeyê xo bîyaro ca.
Konfederasyonê Merkezanê Komelê Kurdan ê Demokratîkan ê Almanya (KON-MED) hêriş û tewirê ke maçê Fenerbahçe-Stuttgartî de vera futbolbazê kurdî Denîz Undavî ameyî kerdene, şermezar kerdî.
Eşkerayîye de nê ameyî vatene: ”Denîz Undavê ke verî vatbi o tirk ney kurd o, maçê Îstanbulî de hem hetê futbolbazan ra hem zî hetê şarî ra raştê hêrişî ame. Spîkerê TRT’yî nameyê Undavî nêvat. No têna eşkera nimûneyê nîjadperestîye yo. Undavo ke raştê hêrişî ama têna nîyo. Sere de Kurdîstan û Tirkîya xeylê cayanê dinya de paştdayîşo gird dîya Undavî. Ma zî sey KON-MED’î paştî danê Denîz Undavî.”
Eşkerayîye de bale ameye ser antene ke Tirkîya de polîtîkayê vera kurdan kirişîyayî warê sporî û ame vatene: ”Şexsê futbolbazêkî de nîjadperestîya vera kurdan ke yeno waştene ke bêro meşrukerdene, eşkera meydan de ya.”
KON-MED’î seba ke wezîfeyê xo bîyaro ca, veng da UEFA û vat: ”Ma veng danê selahîyetdaranê UEFA ke wa na babete de cade tehqîqat bidê destpêkerdene û gamê ke hewce kenê bierzê.”
