Kongreya tarîxî ya PKK’yî ke mabênê tarîxanê 5-7ê gulane de Herêmanê Pawitişî yê Medya de ameye kerdene, manşetê ajansanê mîyanneteweyîyî de ya.
PKK’yî ewro eşkera kerd ke înan kongreya xo ya 12. mabênê tarîxanê 5-7ê gulane de kerde. Eşkerayîye de ame vatene ke detayê kongre do rojanê vernîya ma de bêrê parekerdene.
Xebera kongreya tarîxî ya PKK’yî çapemenîya dinya de cayo hîra girewt. Ajansanê mîyanneteweyîyî yê Reuters, Associated Press (AP) xebere girewt manşetanê xo.
AP yo ke merkezê xo Emerîka de yo bi sernameyê “Grûba mîlîtananê PKK’yî bê teyîtkerdişê vilabîyayîşî vat înan qerarê ‘tarîxî’ girewtî.”
Rueterso ke merkezê ci Îngîlîstan o ajansê ANF’yî nîşan da û vat, “Ajansê ANF’yî da pêhesnayene ke rayberê PKK’yî yo ke zîndan de yo semedê vengdayîşê çekronayîşî kerd, kongreya PKK’yî ‘qerarê tarîxî’ girewtî.2
Radyoyê dewlete yê Fransa RFI zî vat, “PKK’yî da zanayene ke semedê fesihkerdişê xo kongreyê xo bi ‘serkewtiş’ kerd.”
Çapemenîya Fransa ra Courrier Internationalî zî xebera kongre pare kerd û bale ant eşkerayîya DEM Partî ya derheqê kongre ser o.
Rojnameyê Emerîka The Washington Postî zî vat, “Grûba mîlîtananê PKK’yî bê tesdîqkerdişê vilabîyayîşî da zanayene ke qerarê tarîxî girewtî.”
Rojnameyê e-kathimerini yê Yunanîstanî zî ajansê ANF’yî sey çime mojna û bi sernameyê ‘PKK’yî kongreya xo ya 12. de qerarê tarîxî girewtî’ xebere pare kerde.
Al Monitor ê Emerîka zî vat, ‘PKK’yî kongreya xo sey cewabdayîşê vengdayîşê Rayber Apoyî yê qedînayîşê şerê bi Tirkîya, kerd.’
Dezgehê çapemenîya Elmanya Deutsche Welle zî pelê tirkî de eşkerayîya kongreya PKK’yî sey PKK: “Ma kongre de qerarê tarîxî girewtî.” girewte rojeva xo.
Pelo tirkî yê BBCyî zî vat, “PKK’yî kongreya xo kerde: ‘Qerarê tarîxî’ ameyî girewtene.”
L’Orient-Le Jouro ke merkezê ci Beyrut o vat, “PKK’yî kongreya xo ‘bi hewayêko serkewte’ kerde.” û erjnayîşo sey “kongre semedê prosesê aştî ‘firsetêko tarîxî yo’” ame kerdene.
