Konseyê Şaristanî yê Amedî bi sloganê “Tayînkerdişê qeyûman û hêrişê weçînîtoxan rê êdî bes o” vernîya Şaredarîya Şaristanî Gird ya Amedî de beyanatê çapemenîye da.
Konseyê Şaristanî yê Amedî vernîya Şaredarîya Şaristanî Gird ya Amedî de beyanat da. Beyanatî de temsîlîyetê Partîya Têduştî û Demokrasîyî ya Şaran (DEM Partî) yê Amedî, Partîya Herêmanê Demokratîk (DBP) yê Amedî, Şûbeya Komela Heqê Merdiman a Amedî ( ÎHD), Parlamentera DEM Partî ya Amedî Adalet Kaya û xeylê welatîyî tewrê beyanatî bîyê. Serekê Şûbeya ÎHD’yî yê Amedî Ercan Yilmaz beyanat wend.
Serekê Şûbeya ÎHD’yî yê Amedî Ercan Yilmaz dîyar kerd ke AKP qeyûman tayînê şaredarîyan kena û vat: “Tîrkîya de îlankerdişê rewşa awarte ra pey dewlet bi KHK’yî dest bi tayînkerdişê qeyûman kerd. Serra 2016î de 95 heb şaredarîyanê BDP’yî rê qeyûm ame tayînkerdene. Temsîlîyetê hukmatî yê ke waştêne bi nêzdîbîyayîşê ‘terorî’ bêhiqûqîya teyûman rewa bikê weçinitişanê 31ê adara 2019î ra pey Wezaretê Karê Zereyî 3 şaredarîyanê şaristanê gird, 5 şaredarî, 33 şaredarîyê qezayî û 7 şaredarîyê şaristanokan bi pêroyî 48 heb şaredarîyanê HDP’yî rê qeyûm tayîn kerd. Wexto ke seba aştî munaqaşeyî yenê kerdene reyna qeyûman tayînî şaredarîyan kenê. 3ê hezîranê 2024î de qeyûm tayînê Şaredarîya Colemêrgî kerd. Ey ra dima tayînkerdişê qeyûman dewam kerd. Tewr peyên qeyûm tayînê Şaredarîya Şaristanê Gird yê Wanî kerd. Weçinitişan ra pey qeyûm eşt 11 şaredarîyan. Nê şaredarîyan ra 9 hebê înan yê DEM Partî û 2 hebê înan zî yê CHP yî. Bi nê qeyûman heqê weçinitiş û weçînîtoxî binpay kenê. Îqtîdaro sîyasî seba meşrûkerdişê qerarê qeyûman hukmê keno amûr û hemşaredaran rê ceza birneno.
Ma sey Konseyê Şaristanê Amedî çiray zilmê hiqûqî û astengîyanê verba welatîyan ke wazenê heqê xo yê numayîşê aştîye bipawê, qebul nêkenê. Ma vengdanê ke ca de heme welatîyê ke seba bikarardişê heqê xo yê kombîyayîş û numayîşê ke qanûn û xeylê metnanê qanûnanê gerdûnî de sey heq ameyê namekerdene, serbest bêrê veredayene, heme prosesê ke tayînkerdişê qeyûman ê ke heta nika ameyê kerdene, bêrê vindarnayene.”
