Pisporê têkilîyanê mîyanneteweyîyan Dr. Toros Korkmazî bale ant hesasîyetê rewşa Îranî ser o û îfade kerd ke ganî polîtîkayêka hîra bêra teqîbkerdene, Rojawan seba pêro Rojhelatê Mîyanênî modelêko baş o.
Akademîsyenê Zanîngehê Zurichî û Pisporê têkilîyanê mîyanneteweyîyan Dr. Toros Korkmazî derheqê şerê mabênê Îsraîl û Îranî û rewşa Rojhelatê Mîyanênî de ajansê ma ANF’yî qisey kerd.
Korkmazî da zanayene ke bi rijîyayîşê rejîmê Sûrîye û bi operasyonanê Îsraîlî yê vera Hamas û Hîzbullahî rewşêka newîye vejîyaye orte. Korkmazî pare kerd ke şarê farsan de hîsê neteweperestîye xurt o û şar do hetê dewleta Îranî de vindero ke binê hêrişanê îsraîlî de ya.
Dr. Korkmazî îfade kerd ke bi taybetî Rojhelatê Kurdîstanî de têkoşînê heqan nê prosesî de berzêr beno û vat: “Eşkerayîya PJAK’î tabloyêkê xirabî nêvirazena. Seba kurdan proses hesas û têmîyankewte yo. Hetê Îsraîlî de vindertiş seba hêzanê kurdan do bibo sebebê netîceyanê xiraban. Coka ganî têgêrayîşê kurdî ziwan û sîyasetêkê hemparî bikerê. Beno ke nê prosesî de kurdê Îranî waştişanê xo yê xoserîye bizêdînê coka Tirkîya zî do prosesê aştî bi lez bikera.”
Korkmazî dîyar kerd ke eke nê prosesî de Îran birijîyo zî beno ke otorîteyo merkezî hîna xurtêr bibo û vat: “Polîtîkayê seba azadîya cinîyan do komanê şarê kurdî, tirk, ereb û azerîyan de cewabêkê cidîyî vînenê. Na babete de Rojawan seba pêro Rojhelatê Mîyanênî modelêko baş o.”
