Pirdo Des Berin ke demê Merwanîyan de serra 1065î de Royê Dîcleyî ser o ameyo viraştene, eynî demî de mîyanê peyzajê xozayî yê Amedî de sey zernnêk o ke heta ewro xo ser vinderto. Fotoyê ke Google Earthî ra ameyî girewtene, ekoqirkerdişê pird û derûdorê ci eşkera kenê.
Pirdo Des Berin ke demê Merwanîyan de serra 1065î de Royê Dîcleyî ser o hetê mîmar Yusufê lajê Ubeydî ra ameyo viraştene û heta ewro xo ser vinderto, ewro binê talûkeyê ekoqirkerdişî de yo ke roje bi roje destê merdiman ra yeno kerdene. Eynî demî de no pird ke sey zerrnê peyzajê xozayî yo ke Newala Dîcleyî û Baxçeyê Hewselî virazeno, awanîyê her di hetanê ci serra 2016î de bi qeyûmê ke ame tayînkerdene Şaredarîya Amedî ya Şaristanê Girdî de, dest pê kerd.
Fotoyê ke Google Earthî ra ameyî bi girewtene, tede serra 2014î de pird û derûdorê ci de qet awanî çin bî, bi qeyûmanê ke serra 2016î de ameyî tayînkerdene, roje bi roje berzbîyayîşê dêsanê betonî aseno.
Xebatanê zanistîyan de ke herêma Newala Royê Dîcleyî û Baxçeyê Hewselî de ameyî kerdene, nêzdîyê 607 tewirê nebatan û 635 tewirê heywanan ameyî tesbîtkerdene. Na herême ke cayê ciwîyayîşê teyran, şitdaran û tewirê kêzikan a, neslê xeylê tewiran binê talûkeyê qedîyayîşî de yo. Bi taybetî derûdorê Pirdo Des Berin de û herêmanê bînan de, molozo ke royî de bila bîyî û dêsê betonî ke berz benê, roje bi roje xoza xirab kenê.
Darûberinkerdiş çin o, ekoqirkerdiş est o
Seke wayîrê tesîsan ke hûmarê înan roje bi roje zêde beno û sînoranê xo hîra kenê, vanê cayê darûberinkerdişî de herême de vurîyayîşê serran fotorafran ra dîyar beno.
