Hemsereka Meclîsa Şarî ya Taxa Şêx Meqsûd û Eşrefiyeyî Hevîn Silêmane derheqê rewşa Helebî de qisey kerd û va ke nika taxan de îradeyêka şarî ya xurte est a û komel pîya cuyeno. Hêvîn Silêmane nîşan kerd ke Tirkîya xizmetê taxan asteng kena.
Taxê Şêxmeqsûd û Eşrefiyeyî bi serran o ke vera hêrişan û dorpêçê sîstemî xo pawenê. Dima ke HTŞ hukmatê Şamî dest rona ser, rayverîyê xosere yê taxan û rayîdarê Helebî pêameyîş îmza kerdî. La hema zafê waştişanê înan ameyê ca nêardene û zextî şarî ser o dewam kenê.
Hemsereka Meclîsa Şarî ya Taxa Şêx Meqsûd û Eşrefiyeyî Hêvîn Silêmane va ke şarê kurd, ereb û suryan pêro piya ciwîyenê û wina vana: “Wexta ke Rejîmê Baasî ser o bi, vera taxanê Şêx Meqsûd û Eşrefiyeyî hêrişê zaf dijwarî estbî. Bi taybetî vera şarê kurdî yê taxanê Şêx Meqsûd û Eşrefiyeyî hêrişî giran bî. Kurd, mesîhî, ermenî û pêrabesteyê bînî zî ciwîyenê. Suryanî û mesîhî zî bi hawayêkê asayî bawerîya xo nê taxan de ciwîyenê û dêrê înan zî est ê. Meclîsê nê taxî îradeyê her kesî bingeh girewt. Pêro pêrabesteyî bîyî yew û vera hêrişan vejîyayî û hêrişî pûç kerdî. Nika zî tifaq û pawitiş dewam keno. Nika cemaetêko asayî û yewgireye est o. Êyê ke komel vila kerdî, sîstemê desthilatdarî yê. Êdî pêrabesteyî nê ferq kenê û hîna zaf yewbînan verra kenê. Dima ke pêameyîş ameye kerdene heta nika hêrişê ke pêrabesteyan yewbînan ra bivejê û zerar bidê taxî, nêameye kerdiş. Îradeyêka xurte ya pêroyî taxan de est a.”
Hêvîn Silêmane va ke meclîsan de temsîlkarê pêro pêrabeste û bawerîyan ca gênê û wina vana: “Pêro pêrabesteyî bawer kenê ke çareserî û xilasî zî nê îdareyî reyde ya. Bawer kenê ke Îdareyê Xosere do vera pêro sîyasetanê înkar û îmhayî bibo cewab. Şar yewgireye yo û yewbînan ra wayîr vejîyeno. Kurd û ereb pêro pîya her qadan de taxanê Eşrefiye û Şêx Meqsûdî pawenê. Asayîşê taxî tepişenê. Şewe û roje taxî pawenê. Vera pêro hêrişan benê cewab.”
Waştêne taxan îşxal bikerê
Hêvîn Silêmane nîşan kerd ke verî ke HTŞ derbasê Şamî bibo taxê Eşrefiye û Şêx Meqsûdî ameybî dorpêçkerdene û wina dewam kerd: “Taxî ser o hêriş û lejê taybetî estbî. Waştî kurd, ereb û tirkmenan yewbînan cîya bikerê. La şar tedbîranê xo girewt û destûr nêda. Serranê 2015-2016î de bi yewbîyayîşê çeteyanê dewleta Tirkî hêriş kerdî. Waştô taxan îşxal bikerê. La şar vera hêrişan bi cewab. Rejîmê Baasî xortanê ma tepiştenê. Destûr nêda ke şar lazimayanê xo yê cuyayîşî teber ra bigîro. Rejîmê Baasî hetkarî asteng kerdî. Rayîrê şarî birna. Şîrê putan asteng kerdêne. Sîyasetê veyşanîye taxan ser o şuxulnayî. Mazot qedexe kerdêne. Cîhê serdî ra zaf nêweşan cuyeyê xo vîyart. Dima ke HTŞ derbasê Heleb, Hims û Şamî bi, çend rojan de kontrol girewto destê xo. Dima ke HTŞ ame, reyna sîyasetê verênî dewam keno. Heta nika HTŞ’î Şam de hetê hişmendî ra tu vurîyayîş nêkerdo. Hişmendîyêka olî ya tûndîya şarî ser o ferz kenê. Ma dîy ke dima ke rejîm çin bî û HTŞ hukmat girewt xo dest, deşta perawî de komkujîyî ameyî kerdene. Elewî ameyî kiştene. Şam de zî komkujîyî ameyî kerdene. Hêrişî dewam kenê. Çeteyê bi nameyê Emşat û Hemzat ewro çalak ê. Nameyê cîyayî xo ser o kerdî. Destê înan qirkerdişê elewî, durzî, xirîstîyanan de est o. La şar ewro xo rêxistine kerdê û tifaqê durzî, elewî, xiristîyan û pêro pêrabesteyanê deşte xurt kenê.”
Hêvîn Silêmane dest nîşan kerd ke bi taybetî dima ke mîyanê HTŞ û HSD’î de pêameyîş ame îmzekerdene rewş vurîya û wina vana: “Pêameyîşê 1ê Nîsanî seba taxanê Şêx Meqsûd û Eşrefiyeyî zaf muhîm a. Goreyê pêameyîşî, hêzê zereyî do taxan bipawê. Ma bi seyan serran o ke pêro pîya ciwîyenê û yewbîyayîşêk est o. Nê çeteyanê deşte waştêne ke kurdan ser o qirkerdişî bikerê. No pêameyîş vera hêrişan bi cewab.”
Tirkîya xizmetê pêroyî asteng kena
Hêvîn Silêmane dîyar kerd ke ser o xalanê pêroyî nika pêvînayîşî est ê û wina vana: “Nê pêvînayîşan de hem aştî hem zî astengî est ê. Nika mîyanê Şaredarîya Helebî û Meclîsê şarî ya taxan de pêvînayîşî yenê kerdene. Çitur ke Şaredarîya Helebî xizmetê pêro taxanê Helebî kena, do zî seba taxanê Şêx Meqsûd û Eşrefiyeyî zî xizmet bikerê. Xebatê seba xizmetê taxan dest pê kerdî. Çend serrî yo ke rayîrî xerab bîyê. Seba viraştişê rayîran xebatî dest pê kerdî. La seba ke kar û xebatêko pêroyî bêro kerdene, astengî zî est ê. Nê astengî zî destê dewleta Tirkî ra yenê. Dewleta Tirkî nêwazena ke şarê Sûrîye pêro pîya bijîyê û nêwazena ke tifaqê şaran Sûrîye de ser bikewo. Şaristanê Helebî raştê raşt kontrolê dewleta Tirkî de yo. Nê sebebî ra Tirkîya vera pêvînayîşî astengîyan vejenî. La têkoşînê ma yê seba pawitişê pêvînayîşî dewam keno.”
Tirkîya vera tifaqê şaran a
Hêvîn Silêmane bal ant ser o xala pêameyîşî û wina vana: “Komê dîyine nêameye berdayene. Seba ke komê dîyine zî bêro berdayene, têkilî û xebatî dewam kenê. Rojanê peyênan de ganî zerrîya ma bêrê berdayene. Pêro zerrîya ma destê MÎT’ê Tirkan de yê. La ê ney qebûl nêkenê. Tirkîya nêwazena ke projeyê demokrasîyî û tifaqê şaran ser bikewo. Çunke Tirkîya goreyê menfaetê xo nêzdî bena.”
Hêvîn Silêmane wina qedîna: “Ma tedbîranê asayîşê xo gênê. Ma her tim mîyanê şarî de hişyarî kenê. Ma wazenê ke her kes sey endamê pawitişî hereket bikero û xo bipawo. Hetê rewşa ekonomî ra zî tu vurîyayîşê girdî nêameyî kerdene. Çimkî rewşa ekonomî bi pêroyîya ekonomîya Sûrîye giredayî ya. Hetê ekonomî ra rewşa şarî dijwar a. Şar hema zahmetîyî ciwîyeno. Geşedanê ke Şam de benê, çi erênî û çi nêyînî tesîrê xo taxanê Şêx Meqsûd û Eşrefiye ser o zî kenê. Tersê şarî est o. Çimkî cîhadîstî hema serbest hereket kenê. Heleb de rojane merdimî yenê kiştene û remnayene. Merdimî yenê vînîkerdiş. Nê sebebî ra ters est o. Heleb û Şam de, ê HTŞ nika tede serek a, reyna merdimî tede yenê kiştene. Cinî yenê remnayene, qirkerdişî est ê. Heta nika rewşa hin cinîyanê elewîyan nêdiyar a. Cayê ke HTŞ tede ya, karê xerabî yenê kerdene. Temîyanî û nêaramîye est a. Nê sebebî ra ma vanê; ma do her tim pawitişê xo xurt bikerê. Ma do têkilîyanê xo yê bi pêrabesteyan reyra hîna zaf xurt bikerê ke ma eşkê ferasetê qirkerdişê xo ser ra hewanê.”
