Serekê Meclîsî Numan Kurtulmuş derheqê qerarê Têgêrayîşê Azadîye yê Kurdî de qisey kerd. Kurtulmuşî dîyar kerd ke ê êdî vîyarenê serdemêko newe û nê serdemî de çek û pirodayîşan peyê xo de verdanê û do hîna zaf demokrasî û fikran ser o qisey bikerê.
Serekê Meclîsî û Komîsyonê Waûbirayî û Demokrasî û Piştîdayîşê Mîllî Numan Kurtulmuş torenê serra Akademîk ê 2025 û 2026 ê Unîversîteya Balikkesîrî de qisey kerd. Kurtulmuşî dîyar kerd ke cayanê cîya yê dinya de prosesê şer û çareserî derg ramitî. Kurtulmuşî bale ant vengdayîşê Rayberê Şarê Kurdî Abdullah Ocalanî, qeraranê xofesihkerdişî yê PKK’yî û gamanê ke Grûba Aştî û Komelê Demokratîkî eştê ser o û vat: “Tirkîya de mîyanê serrêk de ma resayê proseso ke rêxistine xo fesih kerd û çekan rono. Vizêrî ma qonaxêko tarîxî xo ra pey verda. Rêxistine eşkera kerd ke do xo bi temamî sînoranê Tirkîya ra apey bianco û Tirkîya de çalakîyan nêkero. Ma hêvî kenê ke rêxistina ke xo tîya ra apey anto, demêko tewr kilm de teberê sînorî de zî estbîyayîşê xo biqedîna. Ma hêvî kenê ke tena Tirkîya de nê, Sûriye, Iraq, Îran û herêmanê bînan de zî ma bikewê serdemêko ke êdî behsê terorî nêkerê. Ma seba ney zî xebitîyenê.”
Dewamî de Kurtulmuş îfade kerd ke ê êdî dest bi serdemêko newe kenê ke çek û pirodayîşan xo ra pey verdamê û êdî do fikirî qisey bikerê. Kurtulmuşî vat: “Tu cayê dinya de destêk çekî ser o, desto bîn sindoq ser o nêbeno. Ma hêvîdar ê ke yê ke destê înan sindoqê ser o yê êdî destê înan çekan ser o nêbî. Û seba ney zî ma mîyanê hewldanêk de yê.”
Kurtulmuş derheqê prosesê şer ê Sûrîye zî qisey kerd û vat: “Şarê Sûrîye do rayîr nêdê emperyalîzmo xorîn ke ne dostê tirkan ê ne zî yê kurdan, ereb, sunî û şîîyan ê. Înşela do herême de tena fikirî qisey bikerê. Do mabênê merdiman de êdî tena deyîrê yewîye, piştîdayîş û waûbirayî ca bigîrê.”
