Qezaya Licê ya Amedî de vera mergê biguman ê cinî û gedeyan rayîrşîyayîş ame kerdene û vengdayîşê girewtişê faîlan ame kerdene.
Bi pêşengîya Platformê Cinîyan ê Dîcle Amedî (DAKAP) qezaya Licê ya Amedî de riyê merganê biguman ê cinî û gedeyan ke her ke şono vêş benê, rayîrşîyayîş ame kerdene. Cinîyê ke taxa Kelvanî de ameyê têhet, heta parka Demokrasî rayra şîyê. Hemşaredara Amedî ya Şaristanê Girdî Serra Bucak û hemşaredarê qezayî, xeylê cinîyê sîyasatmedar ê DBP û DEM Partî zî beşdarê rayîrşîyayîşî bîyê. Rayîrşîyayîşî de pankartê “Destanê xo yê lêminan gede û cinîyan ser o biancê” û fotografê cinîyê ke ameyê kiştene, ameyê girewtene. Kesê ke rayra şîyê sloganî “Jin jîyan azadî”, “Cînayetê cinîyan polîtîk ê” û “Bicîwîyo xoverdayîşê cinîyan” vatî.
‘Ma do bêveng nêmanê’
Endama TJA’yî Tulay Denîz eşkerayî wende û dîyar kerd ke zilmê camêrd-dewlete cinîyan qetil keno. Tulay Denîz dîyar kerd ke Yaren Erkaplan 17ê hezîrane de bi hewayêko guman keyeyê xo de merda ameye vînayene û vat ke no merg zî encamê zilmê camêrd-dewlete yo. Tulay Denîz vat: “Licê de cinîyêka ciwane ya 17 serra û diganî çek da sereyê xo ro û cuya xo vîndî kerde. Bi seyan cinî bi îdiaya întîharî yenê qetilkerdene, ma do hemverê nê bêveng nêmanê.”
Aşma gulane de 30 cinî ameyê kiştene
Tulay Denîz dîyar kerd encamê polîtîkayanê cezanêkerdişî de vera cinîyan qetlîamî yenê kerdene û wina vat: “Goreyê daneyanê destê ma de aşma gulane de 30 cinî ameyê kiştene, 6 hebî cinîyan bi hewayêko guman cuya xo vîndî kerda. Ma reyna dîyar kenê ke bi nameyê cînayet yan zî întîharî cinî û gedeyî yenê kiştene. Îstîsmarkerdişê gedeyan yeno nimitene. Vizêr gedayêka kêneke ya 9 serra bi kardî ameyê qirkerdene.”
‘Ma do xopawitişî birêxistin bikerê’
Tulay Denîz dîyar kerd ke do nê her di hedîseyanê Erxenî û Licê taqîb bikerê û qiseykerdişê xo wina qedêna: “Heta ke kerdoxî bêrê vînayene, ma do têkoşînê xo bidomnê. Ma do prosesanê huqûqîyan taqîb bikerê. Cuya ke ma xeyal kenê, qedîyayîşê zilm û kiştişê vera gede û cinîyan û awanlerdişê cuyêka seypê û azad a. Vengdayîşê ‘Aştî û Komelê Demokratîkî’ yê Rayberê Şarê Kurdî Abdullah Ocalanî yê 27ê sibate, vengdayîşê awankerdişê cuyêka winasîn a. Vengdayîşê vindarnayîşê zilm û kiştişê cinî û gedeyan o. Vera şerê taybetî ma do cuya xo birêxistin bikerê û cewab bidê. Bi felsefeya Jin jîyan azadî ma do cuya xo birêxistin bikerê û komelo demokratîk awan bikerê.”
Rayîrşîyayîş bi vatişê sloganan qedîya.
