Rayberanê kampanyaya “Ocalan rê azadîye, seba meseleyê kurdî çareserîya demokratîke” ra yewe û Verfeka Mîyanneteweyî ya NEU’yî Louîse Regan dîyar kerd ke seba ke proses aver şêro, ganî Abdullah Ocalan hetê fizîkî ra azad bo.
Verfeka Mîyanneteweyî ya Sendîkaya Perwerdeyê Neteweyî ya Îngîlîstanî (NEU) Louîse Regan derheqê “Vengdayîşê Aştî û Komelê Demokratîkî” yê Rayberê Şarê Kurdî Abdullah Ocalanî û qerarê Kongreya PKK’yî ya 12. Medya Haber TV rê qisey kerd. Louîse Regan ke rayberanê kampanyaya “Ocalan rê azadîye, seba meseleyê kurdî çareserîya demokratîke”ra yew a, dîyar kerd ke seba averşîyayîşê prosesî ganî Ocalan azad bo.
‘Ganî gamî bêrê eştene’
Louîse Regan îfade ked ke asta global de seba fikranê Abdullah Ocalanî rêze yena girewtene û vat: “Ma behsê rêzgirewtişêko seba nuşteyanê ey, xebatanê ey, bawerî û helwêstê ey o averperwerî kenê. Seba serkewtişê prosesî ganî o beşdarê prosesî bibo heta rayberîya prosesî bikero. Serkewtişê nê prosesî herême de ameyîşê aştî û şarê girêdayeyê ey o. La o hema zî girewte yo û komelî ra ameyo tecrîdkerdene. Demêko ke o girewte bo, zehmet o ke proses aver şêro.”
Dewamê qiseykerdişî de Louîse Regan dîyar kerd ke seba aştî hewce yo babeta azadîya fîzîkî ya Abdullah Ocalanî de gamî bêrê eştene û vat: “Bi nê vengdayîşê peynî êdî meseleyê gameeştişî heme wextî ra hîna lezgînêre bîya.”
Louîse Regan bale ant qeraranê kongreya PKK’yî ya 12. zî û nê erjnayîşî kerdî: “Ganî hukmatê Tirkîya na game sey parçeyêkê prosesî bivîna û cewabêko pozîtîf bida. Lazim o heme hetî bi hewayêko pozîtîf beşdarê prosesî aştî bêrê kerdene. Beşdar nêkerê, o wext mimkun nîyo ke proses aver şêro.”
‘Do kampanya dewam bikera’
Louîse Regan qiseykerdişê xo wina qedêna: “Do têkoşînê ma yo seba edaletî dewam bikero. Ma do kampanyaya xo bidomnê, haydarîyêk awan bikerê û seba veradayîşê ey vengê xo hîna berz bikerê. Daxilbîyayîşê ey o prosesê aştî, seba aştî û edaletî mecbûrîyetêk o.”
