Endama OHD’yî avûkate Zozan Vargun ke derheqê heqê hêvîye û binpaykerdişê heqan de ercnayîş kerd û va: “Ma sey OHD û TOHAV’î sey dewamê xebata ke ma derheqê heqê hêvîye de kerdê, ma do raporê xo pêşkêşê partîyê meclîsî û wezaretê edaletî bikerê.”
Rayberê Şarê Kurdî Abdullah Ocalan 26 serrî yo ke Îmraliyî de binê tecrîdî de yeno tepiştiş û munaqeşeyê ‘heqê hêvîye’ rojeve de cayê xo gêno. 2014ine de Dadgeha Heqê Merdiman ê Ewropayî (DMME) babeta heqê hêvîye de qerar da ke kesê 25 serrî yo zîndan de mendê, ganî heqê hêvîye ra feyde bigîrê. Komîteyê Wezîran ê Konseyê Ewropayî kombîyayîşê 17-19ê êlule de qerarê binpaykerdişan ancî vist rojeva xo û semedê Tirkîya ke gamanê somutî bierzo heta êlule 2025ine wext da. La hema zî Tirkîya game nêeşta.
Endama Komeleya Huqûqnasê semedê Azadîye avûkate Zozan Vargun derheqê ‘heqê hêvîye’ û binpaykerdişê heqan yê zîndanan de jinnewsî rê qisey kerd û va: “Dimayê ke semedê Birêz Ocalanî qanûnê dardekerdişî de vurnayîş virazîya. 2005ine de qanûnê dardekerdişî ame wedaritiş û nê dir rejîmê înfazê muebetê giran ardî. Muebeto giran zî yeno manaya seranserê cuye, tepişte mendiş o. Avûkatanê Buroyê Huqûqê Asrin 2005ine de derheqê binpaykerdişê heqê muhakameyê adîlane yê Abdullah Ocalanî de û 2014ine de zî semedê çinkerdişê heqê hêvîye yê Abdullah Ocalanî û tepişteyanê bînan muracat kerdî. DMME’yî derheqê nê de Tirkîya mahkum kerd û ganî Tirkîya nê gore têbigêra. La Tirkîya a roje ra tu qerar nêdaya û game nêeşta.”
Semedê Tirkîya qerarê komîte
Zozan Vargun dewam de wina va: “Esasê qerarê ke semedê Tirkîya ameyê dayîş de heta 2025ine de gamî nêrê eştiş do komîte derheqê Tirkîya de qerar bido. Çimdarîyê ma zî est ê ke do qerarê îcraî bê. Semedo ke komîte yewin rey o ke gamêke wina cidî eşt. 2004ine de bi wedaritişê cezaya dardekerdişî cezaya muebetî ame. 2014ine de bi di qerarê derheqê Ocalanî de ame waştiş ke heqê hêvîye bêro dayîş û sererastkerdiş bêro kerdiş.”
‘Ganî Birêz Ocalan derbazê pozîsyonê eşkeno biciwîyo û bixebitîyo bibo’
Zozan Vargun tewr peyîn wina va: “Zîndanî açaryayê cayê îşkencexaneyan. Tepişteyî nêeşkenê derman bibê û xoresnayîşê heqê weşîye nêmendo. Ganî raporê tepişteyê ke nêeşkenê tepişte bimanê, verê çiman de bêro girewtiş. Tewrbîyayîşê pêro kesan yê prosesê aştî muhîm o. Ma sey OHD û TOHAV semedê heqê hêvîye, 28ê nîsane de eşkerayîye da. Xebatê ma derheqê babete de dewam kenê. Ma do raporê xo bi wezaretê edaletî û partîyê têkildar yê meclîsî dir pare bikerê.”
