KASED bi domanan reyde yêno pêser û çarçeweyê Roşanê Ziwanê Kurdkî de programanê xo rameno. Mamosteyanê ziwanî eşkera kerd ke ê kulturê xo yo ke ameyo asîmîlekerdene, danê ciwîyayîş.
Komela Kultur, Huner û Edebîyatî ya Cinîyan (KASED) wextanê peyênan de Amed û dewanê ci de seba domanan programanê ziwanî virazena. Programan de averberdişê ziwanî reyde, eynî wextî de seba ke domanî kulturê xo hole nas bikerê zî firsend virazîyeno. Mamosteyanê ziwanî derheqê programan de Jinnewsî rê qisey kerd.
‘Ziwanê ma asîmîle bîyo’
Mamosteya kirmanckî Nîhale Orhan da zanayene ke ziwanê kirmanckî zaf pey de mendo û wina va: “Seba ke ziwanê ma vîndî nêbo, ma dewe bi dewe xebatanê xo ramenê. Ma wazenê ke ziwanê ma biciwîyo. Ganî keyeyî bi domananê xo reyde kirmanckî qisey bikerê. Ganî ma seba ziwanê xo xebat bikerê.”
‘Wa domanî bi ziwanê xo perwerde bivînê’
Momosteya kurdkî Berîvane Duman zî da zanayene ke ganî heme domanî bi ziwanê xo pîl bibê û perwerde bivînê. Berîvane Duman wina dewam kerd: “Amed de Zarokîstan est o. Keyeyî eşkenê bêrê qeydê domananê xo bikerê. Ma çarçeweyê 15’ê Gulane de dewan de xebatan ramenê. Ewro ra dima zî ma do xebatanê xo biramê. Wa keyeyî bi domananê xo reyde kurdkî qisey bikerê. Qiseykerdişê kurdkî zaf muhîm o.”
‘Ganî ma mesulîyetê xo bîyarê ca’
Berîvane Duman wina qedîna: “Zaf şaristanan de Zarokîstan est o. Ma do sazîyanê xo zêde bikerê. Ma wazenê ke kurdkî bibo ziwanêko fermî. Heqê perwerdeyê bi ziwanê dayîke ya her domanî est o. Ma do na babete de mesulîyetê xo bîyarê ca. Heta ke ma ra bêro, ma do xo biresnê her ca.”
