Qoser de rayîrşîyayîşê Egîtîm-Senî “Ma Perwerdeyê bi Ziwanê Dayîke Wazenê” bi qerarê walîyîye hetê polîsan ra ame astengkerdene. Çiqas asteng bo zî endamê sendîka û şar bi çalakîya roniştişî protesto kerd.
Bi pêşengîya Sendîkaya Kedkaranê Perwerde û Zanistî (Egîtîm-Sen) Temsîlkarîya Qoserî Meydanê Azadîye de rayîrşîyayîşê “Ma Perwerdeyê bi Ziwanê Dayîke Wazenê” ame waştene ke virazîyo. Polîsan bi îdîaya “Walîyîye rayîrşîyayîş qedexe kerdo” rayîrşîyayîş asteng kerd.
Astengkerdişê rayîrşîyayîşî ser o endamê Egîtîm-Senî meydanî de pankartê “Em Perwerdehiya Bi Zimanê Dayikê Dixwazin (Ma Perwerdeyê bi Ziwanê Dayîke Wazenê)” reyde çalakîya roniştişî kerd.
Çalakî de ke şarê derûdorî zî piştî daye, slogananê “Ziwanê ma rûmetê ma yo”, “Tedayî ma nêtersnenê” reyde astengkerdişî rê reaksîyon ame mojnayene.
Çalakîya roniştişî de deyîra Aram Tigranî ya “Zimanê Kurdî” ameye vatene. Sendîka seba ke rayîrşîyayîşî rê destûr nêameyo dayene, bi amancê protestoyî beyanat nêda.
Sendîkakaran vat ê qerarê walîyîye protesto kenê û bi sloganan çalakîya roniştişî qedênaye. Temsîlkarê sendîka vat heta ke waştişê înan bêrê qebulkerdene do çalakîyanê xo dewam bikerê.
