FEDA û DAKB’î va: “Ma polîtîkayanê dewleta Tirke yê nê seserre yê înkar, çinîkerdiş û asîmîlasyonî nas nêkenê. Ma zîhnîyetê yewperestî yê Lozanî red kenê. Ma têduştîya şaran û heqanê qanûnîyan yê seyyewbînan wazenê.”
Federasyonê Demokratîkî yê Elewîyan (FEDA) û Yewîya Cinîyan ê Elewîyan a Demokratîke (DAKB) bi wesîleya serrgêra Pêameyîşê Lozanî eşkerayîyêke daye.
Eşkerayî wina ya:
“24ê Temmuza 1923î de şaristanê Lozanî yê Swîsre de pêameyîşêk ameye îmzakerdene. Bi no pêameyîşî qederê ses serran ê şarê kurdî û komelê elewîyan ame dîyarkerdene.
Pêameyîşo ke serra 1923î de şaristanê Lozanî de ameye îmzakerdene, tenya sînorî ne, eynî wextî de qederê şaran, bawerîyan û civatê bawerîyan zî dîyar kerd. Pê Pêameyîşê Lozanî dewleta Tirke awankerdişê xo yê serê bingeyê yewdewlete, yewnetewe, yewziwanî û yewbawerîye îlan kerd. Dewleta Tirke bi no pêameyîş seke seba şarê kurdî, eynî şeklî de seba ma elewîyan zî bîye mîladêko ke înkar, asîmîlasyon û çinîhesibnayîşî kerdê fermî.
Pê Pêameyîşê Lozanî dewleta Tirke ya ke serê neteweya Tirkî û bawerîya sunî ser o ameya awankerdene, qedexeyê serê cem, ocax, pîr û rayberanê elewîyan domnayî. Çimkî dewleta Tirke destpêk ra waşt ke na bawerîya qedîme sey tehdîdêk bivîno ke ganî bêro çinîkerdene, û aye çinî hesibnaye.
Pê Pêameyîşê Lozanî dewleta newîye ya ke ameye awankerdene û zîhnîyetê yewperestî yo ke bi destê dewlete ame awankerdene, zemînê domnayîşê zextanê serê elewîyan awan kerd. Bawerîya elewîyan sey ‘rayîr ra vejîyayîş’ ameye îlan kerdene û şaro mexdûr bi dejê girdan reyde rî bi rî mend.
Dewlete na ra cesaret girewt û cemî ameyî qedexekerdene, pîrî ameyî tepiştene û murşîdî ameyî qijkekerdene. Dêrsim de qirkerdiş kerd, Mereş, Sêwas û Çorum de elewîyî ameyî qetilkerdene û keyeyê înan ameyî rijnayene. Nê pêro netîceyê fetwaya gûnîne ya Lozanî yê ke qetilkerdişî wacib vînena.
Ewro Sûrîye de çeteyê ke DAIŞ’î ra mendê, bi na fetwa hêrişê şaranê durzî û elewîyan kenê ke no zî mojneno ke mîraso înkarker ê verênî dewam keno. Heqaret camêrdanê durzîyan rê yeno kerdene, bawerîya înan yena qijkekerdene û cinîyê elewîyî sey xenîmetê şerî esîr yenê girewtene. Dewleta Tirke seba pawitişê nê pêameyîşe paştî dana nê zulmî û reyde operasyonan çeteyan erşawena. Ma sey elewîyê Rêya Heqî nê qirkerdişan hewl nas kenê; çimkî eynî senaryo bi serran o ke serê ma de yeno tetbîqkerdene.
Serrgêra 102. ya Pêameyîşê Lozanî de zî sey kurdan ma elewîyî zî çinî yenê hesibnayene. Sîstemo ke bawerîya xo dispêro yewperestîye, hîna zî dewam keno. Labelê elewîyîye bawerîyêka û heqîqetê komelê elewîyan a. Kes nêşkeno nê heqîqetî bêveng bikero. Ma do bi cemanê xo tim heqîqetê xo bipawê û bîyarê ziwan.
Ma sey Federasyonê Demokratîkî yê Elewîyan (FEDA) û Yewîya Cinîyan ê Elewîyan a Demokratîke (DAKB) polîtîkayanê dewleta Tirke yê nê seserre yê înkar, çinîkerdiş û asîmîlasyonî nas nêkenê. Ma zîhnîyetê yewperestî yê Lozanî red kenê. Ma têduştîya şaran û heqanê qanûnîyan yê têduştîyan wazenê.”
