Rayedarê Komeleya Şêx Seîdî Ramazan Ari va ke ê mezelanê xo wazenî la ê nêwazenî cayê mezelanê înan bibedilnî û wina va: “Cayê mezelanê înan, ma rê nîşan bidê la cayê mezelan wa cayê xo de bimanî. Ma zanenî şehîdêk kura de kewt erd, cayê ey uca yo.”
Şêx Seîdî sey welatperwerê cesur, zanist û hîsgêrî û serkêşê şarê xo neheqîya ke kurdî raştê ci ameyî qebul nêkerd, vera înkarê vera kurdan vejîya. Têkoşînê ke ey da îtîrazo tarîxî yê vera neheqîye û înkarî yê serê şarêkî yo. Dewleta qirker çend biwazo bi qirkerdiş û îdaman têkoşînî bifatisno zî înan dewaya xo ra tewîz nêda, bi tewirê xo Kurdİstan de tradîsyonê xoverdayîşî aver berd. Netîcaya têkoşînê Şêx Sedî û Seyît Rizayan de Kurdîstan de têkoşîn û xoverdayîş kêm nêbîyî, heta vejîyayîşê PKK’yî nê prosesî wina dewam kerd. Bi vejîyayîşê tarîxî yê Rayverê Şarê Kurdî Abdullah Ocalan û PKK’yî têkoşînê Şêx Seîd û embazanê ci kewt merhaleyêka tarîxî ya newî, şorişê ganîbîyayîşê neteweyî ame ca û sîyasetê înkar û îmhayî ame şiktene. Şarê kurdî wazeno ke mezelê Şêx Seîd û embazanê ey bêrê dîyarkerdiş û Komeleya Şêx Seîdî zî seba ci têkoşîn dana.
Rayedarê Komeleya Şêx Seîdî Ramazan Ari vîrardişê Şêx Seîd Efendî û embazanê înan ser o ajansê ma (AW) rê qisey kerd.
Rayedarê Komeleya Şêx Seîdî Ramazan Ari va ke emserre seserra Serewedartişê Şêx Seîd Efendî û embazanê ey ê yo, têkoşîn û emegêk ê dayî, ê milê xo verê înan de ronayenî û wina va: “Çîke ezîyetêko zaf gird dîyî, dewayêka zaf pîl ardî verê ma û dewaya înan resa nê rojane. Emserre zî pêvajoyêk destpê kerda, ma zî sey komeleyêk hetkarîya danî na pêvajo rê. Ma do ti reyde welatê xo, Tirkîya û Dinya rê rindekêk anenî, ma wazenî her çar parçeyê Kurdistanî de zî însanê ma eziyet nêvînî û çimkî têkoşînê Şêx Seîd Efend û embazanê ey na ser bi, fikrê înan ser na bi. Her tim mîyanê miletê xo de bîyî, fikr û têkoşînê înan qalbî ra daynî.”
‘Wezaretî verpersêko raşt nêda ma’
Ramazan Ari bal ant ser xebatanê Komeleya Şêx Seîdî û wina domna: “Komeleya ma zî nê 11 serre ya ke faîlîyet kena, ma zî fikr û ramanê Şêx Seîd Efendî wazenî rindek û weşîyêke bivejîyo. 13ê Sibata 2022î de ma mahkeme ra dewayêk akerd, ma waşt cayê mezelê Şêx Seîd Efend û embazanê ey bonder bibî. Çi heyf ke wezaretî ma rê verpersêko raşt nêda ma, eleqayê ma çin o. Halbukî ma zanenî, xebara înan est a. Serra 1931î de Wîlayetê Dîyarbekîrî mezelê Şêx Şemsettînî tesdîq kerdbi, no ser mezelê Şêx Semsettînî vetî û berdî Qamişlo. Ma zanenenî mezelê Şêx Seîd û embazanê ey Verê Koyî (Qada Şêx Seîdî) de yo, ma ca zanenî çimkî pîlanê ma, ma rê ca vatî. Nêdayîşê mezelî şerm û eybêko pîl o, seserre vîyart.”
Miletê kurd do serfiraz bibo
Ari eşkera kerd ke hazir pêvajoyêk destpê kerda, ê hukmatî ra nîşaneya samîyetî wazenî û wina qiseyê xo domna: “Ma mezelanê xo wazenî la ma nêwazenî cayê mezelanê înan bibedilnî. Cayê mezelanê înan, ma rê nîşan bidê la cayê mezelan wa cayê xo de bimanî. Ma zanenî şehîdêk kura de kewt erd, cayê ey uca yo. Ma wazenî, şîrî mezelan ser o fatîhayêk biwanî, encax miletê kurd wina serfiraz beno.”
Ari qiseyê xo wina qedîna: “Hewteyêko verî ma komxebatêk viraşt, na komxebate ra zî çiqas partî, STK’ê kurdan est ê, ameyî daxîlî na komxebate bîyî. Komxebata ma rojêk ser sibayî ra hetanî saetanê şanî dewam kerd. Zaf nîqaşanê avzel ameyî kerdiş, hîna newe bi do dewamê ci zî bêro. Ma her serre xebatanê wina do bivirazî, 29ê Hezîrane 2025î saet: 17.30 de ma Qada Şêx Seîdî de vîrardişê Şêx Seîd Efendî û embazanê înan virazenî. Ma wazenî çiqas şarê Amedî, kurd û zazayî est ê, wa pêroyî bêrê daxîlî nê vîrardişî bibî.”
