Mamosta Serhed Temelî ke emser dest bi dersdayîşê zazakî kerdo, derheqê probleman de ke dersdayîşê zazakî de est ê, agahdarî da û va ke kêmanîya meteryalan û bêsîstemîye wendekaran dersan ra dûrî fîneno
Mamosta Serhed ke atolyeyeyanê ziwanî de dersa zazakî dano, Ajansa Welatî rê qisey kerd û rewşa meteryal û sîstemî de erjnayîşî kerdî.
Problemê Dersdayîşî
Kêmanîya sîstemêkê standardî, dersdayîşê zazakî de zaf problem vejeno meydan. Her mamosta goreyê zanayîş û tecrubeyê xo dersan dano û metodê înan cîya-cîya yê. No zî seba wendekaranê ke yew daraxî ra vîyarenê daraxê bînî, problemanê neweyan vejeno meydan. Wexto ke wendekarêk daraxêk bedilneno, mufredat zî goreyê metodê mamostayî bedilîyeno, no zî zaf reyan beno sebep ke wendakarî aciz bibê û dersan ra dûrî bikewê.
‘Kêmanîya materyal û mufredatî’
Temelî va ke zazakî de materyal û kitabê dersan zaf kêmî yê, êyê ke est ê reyna goreyê tecrube û zanayîşê yew kesî ameyê hazirkerdene. Her ke şino zî standardê zazakî de tayê çî yenê bedilnayîş û no zî hem mamosta hem zî wendekaran rê zor yeno çunke seba ke perwerde fermî nîyo, musayîş û resnayîşê ê melumatan hende rehet nêbeno. Tayê mamostayanê eynî komele fekê dewe û qezaya xo xebitnenê la seba wendakarêk, mîyanê 2-3 aşman de no bedilîyayîş zaf çetin yeno coka beno sebep ke wendekarî rê musayîşê zazakî bibo zehmet û ca verdo.
‘Wendekarî metod û mufredatî nêvînenê’
Mamosta Serhed Temelî ke emser daraxê destpêkî de atolyeyan de dersa zazakî dano, derheqê nê probleman de qisey kerd. Temelî va: “Her mamostayê zazakî goreyê metodanê xo dersan dano û haya ma yewbînan ra çin a. Ganî sîstemêko stardard bêro awankerdene. Kêmanîya nê sîstemî ra wendekarê ke daraxê xo bedilnenê û vîyarenê daraxêkê bînî, zehmetîye ancenê û demê her daraxî de zî wendekarî vera-vera kêmî benê. Mîyanê eynî daraxî de zî seba ke mufredatê mamostayan çin o zafane dersî spontane yenê dayene. ”
‘Kêmanîya mamostayan’
Seba ke mamostayê zazakî kêmî yê, tayê mamostayê newe hema ke dewreyê kursî nêqedîyeno dest bi dersdayîşî kenê. Temelo ke bi xo zî emser bîyo mamosta û bî reya 3. daraxê destpêkî de onlîne derse dano, va: “Ez zî hema ke kursê xo ra mezun nêbîya seba ke wendekarî bêmamosta nêmanê mi dest bi dersdayîşî kerd. Seba ke hem tecrube/formasyon hem zî prosesê stajî çin bî, bêtecrubeyîya mi beno ke bîyo sebeb ke tayê kesî vato musayîşê zazakî zaf zehmet o û ca verdayo”
‘Ganî standardîye bêro viraştene’
Nê probleman ser o mamostayê zazakî ke ameyox de nê probleman nêancê, ganî mîyanê sazgehêkî de standardîye bêro awankerdene û heme mamostayê sazgehî yew mufredat û meteryalan ser o dersan bidê. Bi no qayde ke her mamosta goreyê metodanê xo ney, goreyê standardanê ke hetê komîsyonêkî ra ameyo dîyarkerdene, dersan bido, do wendekaran rê hîna baş bo.
