Rayber û mamostaya ANKA-DER’î Ferîde Akturan, kombîyayîşê Meclîsê Cinîyan ê Ziwanê Kurdkî de derheqê muhîmîya ziwanê kurdkî û rolê cinîyan de qisey kerd. Akturan va ke cinî domanan kenê gird, coka ganî wayîr vejîyê ziwanê xo û domananê xo bimusnê.
Akturan wina va: “Ma cinî, dayîk ê. Ma domanan kenê gird. Ameyoxê ma bi cinîyan aver şino. Seba ke hem şarê xo rê hem cinîyanê xo rê ganî ma ziwanê xo bimusnê û ci rê wayîrîye bikê, domananê xo rê ziwanê xo bimusnê. Çunke her netewe bi ziwanê xo aver şino.”
Ferîde Akturan dîyar kerd ke UNESCO’yî zî eşkera kerdo ke ziwanê kurdkî binê tahlûke de yo û va: “O semed ra may û pî ma venga înan bidê wa ziwanê xo rê wayîrîye bikê. Ma doman û cinîyan zî bimusnê. Ma şarî rê zî muhimîya ziwanê xo îzah bikê ke wa şar bizano ziwan çend muhîm o. Wa bêro zanayene ke ziwan estbîyayîşê şarî yo.”
Ferîde Akturan qiseykerdişê xo de ard ziwan ke cinî her qade de pêşengîye kenê û wina dewam kerd: “Seke yeno zanayene cinî her qade de pêşengîye kenê, na babeta ziwanî de zî ganî cinî pêşengîye bikê. Coka ma tîya de ameyî têhet, ma qisey kenê ke ma senî eşkenê ziwanî aver berê. Xebata ma ney ser o ya. Ez hêvî kena ke ziwanê ma aver şêro.”
Mamoste Ferîde Akturan peynîya qiseykerdişê xo de dîyar kerd ke kombîyayîşê Meclîsê Cinîyan ê Ziwanê Kurdkî de derheqê vilakerdiş û averberdişê ziwanî de planê muhîmî est ê û va: “Nê kombîyayîşê ma de ma qisey kenê ke ma senî eşkenê her keye bikerê dibistanêk. Ma planê ney kenê.”
