Maya Endamê Komîteya Merkezî ya PKK’î Metîn Arslanî (Koçero Urfa), Fadîle Arslan şîye heqîya xo.
Fadîle Arslana ke maya Endamê Komîteya Merkezî ya PKK’î Metîn Arslanî (Koçero Urfa) ya, eşkerabîyayîşê mergê lajê xo ra nêzdiyê 4 aşmî dima, serra 86ine de şîye heqîya xo. Mergê lajê aye 4ê Teşrîna Peyêne ya 2019î de amebi eşkerakerdene.
Ame zanayene ke Fadîle Arslan nêzdiyê 3 aşmî yo tedawî vînena, demanê peyênan de rewşa ci ya weşîye giran bîya, nêweşîyê ci zêde bîyê û zaf reyan şuurê xo kerdêne vîndî. Fadîle Arslan, tazîyeya ke 12ê Tebaxe de seba lajê ci Metîn Arslan amebî ronayene de qisey kerdbi û vatbi: “Ez bi ey sereberz a. Xwezila canê mi ke mi ewladêko wina resnayo.”
Fadîle Arslan heman wext de cinîya xalê Rayberê Şarê Kurdî Abdullah Ocalanî, Celal Arslanî bîye. Cenazaya Fadîle Arslan ewro do qezaya Nizîpî ya Dîlokî de bêro definkerdene.
